कोल्हापूर : केंद्र सरकारने (Central Government) जुलै महिन्यासाठी देशभरातील साखर कारखान्यांसाठी (Sugar Factories) २४ लाख मेट्रिक टन साखरेचा कोटा विक्रीसाठी जाहीर केला. जून महिन्याच्या तुलनेत जुलै महिन्यात दीड लाख टनांनी कोटा कमी केल्याने साखरेच्या दरात प्रतिक्विंटल किमान १५ ते २० रुपये वाढ होण्याची शक्यता साखर उद्योगातून व्यक्त होत आहे.

दरम्यान, साखरेच्या (Sugar Rate) हमीभावातही वाढ होण्याची शक्यता आहे. सध्या प्रतिक्विंटल ३१०० रुपये साखरेचा हमीभाव आहे. हा हमीभाव किमान प्रतिक्विंटल ४२०० रुपये करावा, अशी मागणी राष्ट्रीय साखर संघ व ‘ईस्मा’ने केली आहे. यावर केंद्र सरकारच्या पातळीवर गांभीर्याने विचार सुरू असून, आठवडाभरात यावर निर्णय होण्याची शक्यता आहे.

साखर हंगामाची सांगता झाल्यानंतर दर महिन्याच्या शेवटच्या आठवड्यात केंद्र सरकारकडून पुढील महिन्यातील साखर विक्रीचा कोटा जाहीर केला जातो. त्याप्रमाणे आज जुलै २०२४ साठी २४ लाख मेट्रिक टन साखर विक्रीचा कोटा जाहीर केला. जुलै २०२३ मध्येही हाच कोटा होता. पण, जून २०२४ मध्ये हा कोटा २५ लाख ५० हजार लाख मेट्रिक टन होता, त्या तुलनेत पुढील महिन्याचा कोटा कमी केला आहे. मागणी व पुरवठ्या तुलनेत हा कोटा कमी असल्याने त्याचा परिणाम दरावर होण्याची शक्यता आहे. त्यातून पुढील महिन्यात साखरेचा दर प्रतिक्विंटल १५ ते २० रुपयांनी वाढण्याची शक्यता उद्योगातून व्यक्त होत आहे.