घुणकी : ‘आज ऊस तोडणी सुरू असलेल्या शेतकऱ्यांना फूल देऊन ऊस तोडणी बंद करण्याचे आवाहन केले आहे. उद्यापासून जर ऊस तोडणी चालूच राहिली तर बंद पाडणार असल्याचा इशारा स्वाभिमानी शेतकरी संघटनेचे (Swabhimani Shetkari Sanghatana) जिल्हाध्यक्ष वैभव कांबळे यांनी वठार तर्फ वडगाव (ता. हातकणंगले) येथे दिला.

साखर कारखानदारांनी (Warana Sugar Factory) मागील हंगामातील चारशे रुपये द्यावे व या हंगामातील दर जाहीर करावेत मगच कारखाने सुरू करावेत, असा पवित्रा स्वाभिमानी शेतकरी संघटनेने घेतला आहे. यासाठी वेगवेगळ्या प्रकारे माजी खासदार राजू शेट्टी यांच्या नेतृत्वाखाली आंदोलने सुरु आहेत.दरम्यान, कारखाना परिसरातील गावांमध्ये ऊसतोडी सुरू केल्या होत्या. याची माहिती स्वाभिमानीच्या कार्यकर्त्यांना मिळाली.

जिल्हाध्यक्ष वैभव कांबळे यांच्या नेतृत्वाखाली स्वाभिमानी शेतकरी संघटनेचे कार्यकर्ते पेठ वडगाव येथे एकत्र आले. वारणा कारखाना परिसरातील भादोले, किणी, घुणकी, चावरे, पारगाव, निलेवाडी, अमृतनगर, पारगाव, मनपाडळे, पाडळी, अंबप, वठार तर्फ वडगाव परिसरात मोटारसायकल रॅली काढण्यात आली. ज्या ठिकाणी ऊस तोडणी सुरू होती, त्या ठिकाणी जाऊन शेतकऱ्यांना फूल देऊन ऊस तोडणी बंद करण्याचे आवाहन केले.

काही ठिकाणच्या ऊस तोड बंद केल्याचा दावा कार्यकर्त्यांनी केला. दरम्यान, रॅलीची सांगता वठारतर्फ वडगाव येथे झाली. यावेळी धनाजी पाटील, सुधीर मगदूम, अण्णा मगदूम, शिवाजी पाटील, सत्वशील जाधव, शिवाजी आंबेकर, सुनिल सुर्यवंशी, सुनील पचिंबरे यांच्यासह स्वाभिमानीचे कार्यकर्ते उपस्थित होते.