कोल्हापूर : साहेब! माझी फसवणूक झाली आहे, एफआयआर घेत नाहीत, नोंद घेतली मात्र पुढे काय झाले कळले नाही, पोलिस ठाण्यात चांगला प्रतिसाद मिळाला, पोलिस तातडीने पोचले, मला पोलिसांची मदत पाहिजे आहे, असे एक, ना अनेक जण रोज थेट पोलिस अधीक्षक शैलेश बलकवडे यांच्याशी संवाद साधतात. जिल्ह्यातील अनेक भागांतून महिला, मुली, नागरिक, ज्येष्ठ नागरिक त्यांच्याशी बोलतात. यासाठी पोलिस अधीक्षकांनी जाहीर केलेल्या मोबाईल क्रमांकाचा वापर होत आहे. विशेष म्हणजे केवळ व्हॉट्‌सॲप मॅसेजद्वारेही नागरिक थेट पोलिस अधीक्षक कार्यालयाशी जोडले आहेत.

पोलिसांचा हद्दीत किती संपर्क आहे, यावर गुन्ह्यांचा तपास होणे किंवा ते प्रतिबंध करणे हे अवलंबून असते. त्यानुसार तेथील कायदा व सुव्यवस्थेची परिस्थिती अवलंबून असते. अनेक तक्रारदारांना ठाण्यात अपमानाला सामोरे जावे लागते. काहींना एका कॉलवरही मदत मिळते, असे एक ना अनेक प्रकार रोज जिल्ह्यात घडतात. यातून थेट पोलिस अधीक्षकांपर्यंत पोचणे अवघड असते. अनेक व्यक्ती पोलिसांपासून दूरच राहतात. अन्याय सहन करतात. अवैध धंद्यावर भाष्य करण्याकडेही दुर्लक्ष करतात. यातून पुढे गुन्हेगारी, तक्रारी वाढत जातात.

मिस्डकॉलवरही संपर्क

रोज किमान आठ-दहा कॉल या क्रमांकावर येतात. किमान २०-२५ मेसेज थेट व्हॉट्‌सॲपद्वारे मिळतात. हा क्रमांक अधीक्षक बलकवडे यांच्याकडेच असल्याने त्याची दखल तातडीने घेतली जाते. काही वेळा बैठकांत असल्याने कॉल स्वीकारता येत नाहीत; पण मिस्डकॉलवर अधीक्षक बलकवडे संपर्क साधतात. आवश्‍यक तेथे संबंधित ठाण्याकडून त्याचा पाठपुरावा केला जातो.

ज्येष्ठ नागरिकांपासून महिलांचेही कॉल-एसएमएस येतात. वाहतूक कोंडीपासून अवैध धंद्यापर्यंत आणि चोरी, तक्रार घेतली नाही, पोलिसांनी प्रतिसाद दिला, अशा सर्वच स्तरांतील माहिती थेट मिळते. या उपक्रमांमुळे ठाण्यातील प्रभारी अधिकारी-कर्मचारीही नागरिकांना योग्य वागणूक देतात. तक्रारीही निकाली निघतात. असा दुहेरी फायदा आहे.

- शैलेश बलकवडे, पोलिस अधीक्षक