‘संगायो’चे अडीच कोटींचे
अनुदान लाभार्थ्यांना मिळणार
गडहिंग्लजला नऊ हजारांहून अधिक लाभार्थ्यांना लाभ
सकाळ वृत्तसेवा
गडहिंग्लज, ता. ४ : संजय गांधी निराधार योजना समितीअंतर्गत येणाऱ्या विविध योजनांच्या तालुक्यातील नऊ हजारांहून अधिक लाभार्थ्यांना जानेवारी ते मार्चअखेरचे दोन कोटी ६४ लाखांचे अनुदान बँक खात्यात जमा करण्यात आले. उद्यापासून ही रक्कम लाभार्थ्यांना मिळणार आहेत.
अध्यक्ष अमर चव्हाण यांच्या अध्यक्षतेखाली योजना समितीची बैठक झाली. तहसीलदार दिनेश पारगे यांची प्रमुख उपस्थिती होती. या बैठकीत संजय गांधी निराधार योजनेंतर्गत विधवा, अपंग, परितक्त्या, अविवाहितचे १०४ प्रस्ताव होते. त्यातील ७० प्रस्तावांना मंजुरी दिली असून, १० प्रस्ताव फेर चौकशीसाठी पाठविले. २४ प्रस्ताव अपात्र ठरविले. श्रावणबाळ योजनेचे ६२ पैकी ४९ प्रस्ताव मंजूर केले. फेर चौकशीसाठी चार प्रस्ताव पाठविले असून, उर्वरित प्रस्ताव नामंजूर केले. एकूण ११९ पैकी १४ प्रस्ताव फेरचौकशीसाठी, तर २७ प्रस्ताव अपात्र ठरविले आहेत.
जानेवारी, फेब्रुवारी व मार्च महिन्याचे लाभार्थ्यांचे अनुदान २ कोटी ६४ लाख ३१ हजार रुपये जवळच्या केडीसीसी बँकेच्या शाखांमध्ये जमा करण्यात आले आहे. सोमवारपासून (ता. ४) या रक्कमेचे वाटप लाभार्थ्यांना सुरू झाले. बैठकीस समितीचे सदस्य हारुण सय्यद, सचिन देसाई, ज्योत्स्ना पताडे, रोहिणी भंडारी, बाळेश नाईक, रमजान अत्तार, सचिव तथा तहसीलदार दिनेश पारगे, अव्वल कारकून विकास कोलते, जावेद बागवान, नायब तहसीलदार राजेंद्र यादव, महसूल कर्मचारी लखन खाडे, रोनाल्ड गोम्स उपस्थित होते.