शिक्षकांचे सातव्या वेतनचे
प्रलंबित हप्ते त्वरित आदा करा

सतेज पाटील यांची विधान परिषदेत मागणी

सकाळ वृत्तसेवा
कोल्हापूर, ता. १८ ः राज्यातील बहुतांश जिल्ह्यातील स्थानिक स्वराज्य संस्था, खासगी अनुदानित प्राथमिक, माध्यमिक आणि उच्च माध्यमिक शिक्षक व शिक्षकेतर कर्मचाऱ्यांना सातवा वेतन आयोगाचे हप्ते, सेवानिवृत्तीची थकीत रक्कम तत्काळ द्यावी, अशी मागणी काँग्रेसचे गटनेते, आमदार सतेज पाटील यांनी विधानपरिषदेत केली. पुरवणी मागणीद्वारे आवश्यक रकमेची मागणी केली असून, निधी उपलब्धतेनुसार सेवानिवृत्त शिक्षकांची थकबाकी दिली जाईल, असे लेखी उत्तर शालेय शिक्षण मंत्री दीपक केसरकर यांनी दिले.
इतर शासकीय व निमशासकीय कर्मचाऱ्यांना दुसरा, तिसरा आणि चौथा हप्ता मिळाला असताना शिक्षक व शिक्षकेतर सातवा वेतनाचा फक्त पहिला व काही ठिकाणी दुसरा हप्ता मिळाला आहे. थकबाकीचा तिसरा व चौथा हप्ता देण्यासंदर्भात ९ व २४ मे रोजी शासन निर्णय निघाला आहे. मात्र, अजूनही दोन्ही हफ्ते देणे प्रलंबित आहेत, याकडे आमदार पाटील यांनी सभागृहाचे लक्ष वेधले.