गडहिंग्लजचे साखळी उपोषण स्थगित

गडहिंग्लज, ता. ३ : मराठा आरक्षणासाठी येथील सकल मराठा समाजातर्फे सुरु असलेले साखळी उपोषण तात्पुरते स्थगित करण्यात आले. दसरा चौकातील छत्रपती शिवाजी महाराजांच्या पुतळ्यासमोर हे आंदोलन सुरु होते. या आंदोलनाला पाठिंबा देणाऱ्या समाजातील सर्व घटकांचे सकल मराठा समाजातर्फे आभार मानण्यात आले.
मराठा आरक्षणासाठी मनोज जरांगे-पाटील यांनी आमरण उपोषण सुरु केले होते. त्यांना पाठिंबा देण्यासाठी येथील सकल मराठा समाजातर्फेही सोमवारपासून (ता.३०) साखळी उपोषण सुरु केले. दरम्यान, शासनाच्या शिष्टमंडळाने जरांगे-पाटील यांची भेट घेतली. त्यांना प्रतिसाद म्हणून २ जानेवारीपर्यंतची मुदत देत जरांगे-पाटील यांनी उपोषण तात्पुरते स्थगित केले. त्यामुळे येथील साखळी उपोषणही तात्पुरते स्थगित करण्यात आले. मराठा मंडळाचे अध्यक्ष किरण कदम यांनी आंदोलनाला पाठिंबा देणाऱ्या समाजातील सर्व घटकांचे आभार मानले.
आजही आजी-माजी सैनिक वेल्फेअर असोसिएशन, जैन समाजाने पाठिंबा दिला. इंचनाळ ग्रामस्थांनी मोटरसायकल रॅलीने आंदोलनस्थळी येत पाठिंबा दिला. प्रसाद पाटील, सोहन होडगे, प्रदीप पोवार, गजानन आर्दाळकर, प्रा. सुनील शिंत्रे, वसंतराव यमगेकर, सुधीर उर्फ आप्पा शिवणे, शिवाजी कुराडे, युवराज बरगे, संजय पाटील, प्रकाश पाटील, अमर चव्हाण, सचिन देसाई यांच्यासह समाजबांधव उपस्थित होते.