ग्रामपंचायतींनी मालमत्तेच्या
नोंदी नोंदवहीत ठेवाव्यातःसंतोष पाटील
कोल्हापूर : ग्रामपंचायतींनी त्यांच्या हद्दीतील स्थावर मालमत्तेच्या नोंदी नोंदवहीत ठेवाव्यात, असे आवाहन जिल्हा परिषदेचे मुख्य कार्यकारी अधिकारी संतोष पाटील यांनी केले आहे. या मालमत्तेवर झालेल्या नवीन बांधकामासह वेळोवेळी होणारा दुरूस्तीचा खर्च ज्या योजनेतून झाला, त्याच्या नोंदी ठेवाव्यात, असेही त्यांनी म्हटले आहे. मालमत्ता संपादनाकरिता घेतलेला परवानगीचा आदेश, विल्हेवाट करतानाच्या ठरावासह हद्दीतील सर्व रस्त्यांच्या लांबी, रूंदीचे तपशील, बंदिस्त गटर्स, शोषखड्डे, गटर्स, ग्रामपंचायतीने खरेदी, संपादित, शासनाकडून हस्तांतरित जमिनी यांची माहिती नोंदवहीत ठेवणे आवश्‍यक आहे. दरवर्षी एप्रिलमध्ये सरपंच व ग्रामसेवक यांनी नोंदवही प्रमाणित करावी, असेही त्यांनी स्पष्ट केले.