कर्नाटकातील काँग्रेस आमदार एकसंध ः सिद्धरामय्यांनी

बंगळूर, ता. १३ : कर्नाटकातील काँग्रेसचे आमचे आमदार विकले जाणार नाहीत. सर्व आमदार एकसंध आहेत. बहुमतातील काँग्रेस सरकार कोणालाही पाडता येणे शक्य नाही, असे मुख्यमंत्री सिद्धरामय्या यांनी स्पष्ट केले. उलट महाराष्ट्रातील सरकारच कोसळेल, असा पलटवार सिद्धरामय्या यांनी केला. लोकसभा निवडणुकीनंतर कर्नाटकात महाराष्ट्राप्रमाणे ‘घटना’ होणार असल्याचे सांगून मुख्यमंत्री एकनाथ शिंदे यांनी कर्नाटकातील काँग्रेसचे सरकार पडू शकते, असे संकेत दिले आहेत. त्यावर कर्नाटकात तीव्र प्रतिक्रिया उमटल्या. उपमुख्यमंत्री डी. के. शिवकुमार म्हणाले, ‘‘शिंदे यांचे सरकार टिकेल की नाही, याबाबत शंका आहे. शिवसेना आणि राष्ट्रवादी काँग्रेसमधून स्थलांतरित झालेले आता मातृपक्षात परतत आहेत. लोकसभा निवडणुकीनंतर महाराष्ट्रात आमच्या पक्षाचे म्हणजेच महाआघाडीचे सरकार येईल. पराभवाच्या भीतीने पंतप्रधान उद्धव ठाकरेंवर टीका करीत आहेत.’’
-------
‘नाथ ऑपरेशन’द्वारे सरकार पडेल ः शिंदे
सातारा, ता. १३ ः महाराष्ट्रातील सातारा येथे बोलताना शिंदे म्हणाले, ‘मी नुकताच कर्नाटकात सभेला गेलो होतो. ‘नाथ ऑपरेशन’ कर्नाटकातही काम करेल. तेथील मतदार ‘नाथ ऑपरेशन’ म्हणजे काय, असे विचारले. ‘नाथ ऑपरेशन’द्वारे कर्नाटकात काँग्रेसचे सरकार राहणार नाही. लोकसभा निवडणुकीनंतर कर्नाटकात येण्याचे निमंत्रण कर्नाटकातील नेत्यांनी आपल्याला दिले आहे.’’