अतिसुरक्षा भेदून मोबाईल अंडासेलमध्ये
कळंबा कारागृहात पुन्हा प्रकार; मोकातील बंदी अनिकेत जाधवचे कृत्य
सकाळ वृत्तसेवा
कोल्हापूर, ता. १५ : कळंबा मध्यवर्ती कारागृहातील बरॅक, शौचालये, भिंती अशा जागा भेदून मोबाईल थेट अतिसुरक्षेच्या ''अंडासेल''मध्ये आढळल्याने खळबळ उडाली आहे. मोकातील बंदी अनिकेत ऊर्फ बंटी नारायण जाधव याने हा मोबाईल स्वच्छतागृहाच्या पाईपमध्ये लपवल्याचे आढळल्याने त्याच्यावर जुना राजवाडा पोलिस ठाण्यात गुन्हा दाखल करण्यात आला.
कारागृहात मागील दीड महिन्यांत शंभरांवर मोबाईल सापडले आहेत. तत्कालीन अधिकारी, कर्मचाऱ्यांच्या चुकांमुळे अनेक बेकायदा कामे चालली होती, हे स्पष्ट झाले. याप्रकरणी दोन अधिकाऱ्यांसह अकरा जणांवर बडतर्फीची कारवाईही झाली आहे. ''ऑपरेशन कोल्हापूर क्लिन'' अंतर्गत सध्या प्रभारी अधीक्षक विवेक झेंडे यांच्याकडून झडती सुरू आहे. त्यांनी मागील पंधरा दिवसांत २५ मोबाईल, चार्जर, बॅटऱ्या जप्त केल्या आहेत.
तुरुंग अधिकारी भारत पाटील अंडासेलमध्ये तपासणी करीत असताना स्वच्छतागृहाच्या पाईपमध्ये मोबाईल आणि बॅटरी मिळाली. चौकशीत मोका बंदी अनिकेत जाधव यानेच मोबाईल ठेवल्याचे समोर आल्याने त्याच्याविरोधात गुन्हा दाखल केला.
चौकट
...तर अनेक गोष्टी समोर येण्याची शक्यता
गंभीर स्वरूपाचे गुन्हे, नामचिन गुन्हेगारांची रवानगी ज्याठिकाणी केली जाते त्याला अंडासेल असे म्हटले जाते. इतर बंदीहून या बंदीवर अधिक लक्ष केंद्रित करण्यात येते. याठिकाणी बंदिस्त जागेत राहावे लागते. याच ठिकाणापर्यंत मोबाईल जाणे ही गंभीर बाब असून, याचा सखोल तपास केल्यास अनेक गोष्टी समोर येण्याची शक्यता आहे.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.