‘कोल्हापूर हायकर्स’तर्फे
शिवराज्याभिषेकदिनी जलाभिषेक
देशातील गड, नद्यांमधील पाण्याचे संकलन
सकाळ वृत्तसेवा
कोल्हापूर, ता. १ : शिवराज्याभिषेक दिन सोहळा सहा जून रोजी रायगडावर भव्यदिव्य स्वरुपात साजरा होत आहे. ‘कोल्हापूर हायकर्स’ तर्फे यावर्षी हिमालयातील पवित्र जलासोबतच सह्याद्रीतील गड-किल्ले व नद्या अशा विविध ठिकाणांहून पाणी संकलित करण्यात आले आहे. यामध्ये जिंजी (तमिळनाडू), केदारनाथ (उत्तराखंड), सरस्वती नदी (माना उत्तराखंड), भुदरगड, रांगणा, मौनी महाराज समाधीस्थळ, तोरणा येथील पाण्याचा समावेश आहे, अशी माहिती कोल्हापूर हायकर्सचे संस्थापक सागर पाटील यांनी आज येथे पत्रकार परिषदेत दिली.
पाटील म्हणाले, ‘सह्याद्री पर्वत रांगा आणि हिमालयातून ट्रेकिंग करून दरवर्षी कोल्हापूर हायकर्सचे मावळे शिवराज्याभिषेक सोहळ्यासाठी हे जल आणत असतात. यंदासुद्धा देशाच्या चारी दिशांतून हे जल आणण्याची मोहीम हाती घेऊन यशस्वी करण्यात आली. यासाठी कोल्हापूर हायकर्सचे पहिले पथक एक मे महाराष्ट्र दिनापासून या पवित्र जल संकलन मोहिमेसाठी रवाना झाले होते. विविध ठिकाणांहून हे पवित्र जल एकत्रित करून पाच जून रोजी रायगडावर पोहोचवणार आहोत. त्यानंतर सहा जून रोजी शिवराज्याभिषेकदिनी छत्रपती शिवाजी महाराजांच्या मूर्तीवर जलाभिषेक करण्यात येईल.’ यावेळी राजेंद्र भस्मे, श्रावणी पाटील, विजय ससे, इंद्रजित मोरे आदी उपस्थित होते.