तोतया कस्टम, सीबीआय अधिकाऱ्यांनी
महिलेला २० लाख रुपयांना फसविले;
परदेशातील पार्सलमध्ये ड्रग्ज असल्याची घातली भीती

सकाळ वृत्तसेवा
कोल्हापूर, ता. ८ : तुमच्याकडून परदेशात पाठविण्यात येणाऱ्या पार्सलमध्ये ड्रग्ज सापडल्याची भीती दाखवत तोतया कस्टम अधिकारी व सीबीआय अधिकाऱ्याने एका महिलेकडून २० लाख रुपये उकळले. संबंधित महिलेशी फोनवरून बोलणाऱ्या अनिल यादव व अजित नावाच्या दोघांनी २ ते ५ जून दरम्यान वेळोवेळी ही रक्कम बॅंक खात्यातून वळवून घेतली. शाहूपुरी पोलिस ठाण्यात याची नोंद करण्यात आली. सायबर पोलिसही याचा समांतर तपास करीत आहेत.
या प्रकरणी पोलिसांनी दिलेली माहिती अशी ः नागाळा पार्क येथील सौ. नवोदिता घाटगे यांनी या संदर्भात फिर्याद दिली आहे. त्यांना दोन जून रोजी एक दूरध्वनी आला. ‘तुम्ही मलेशिया येथे पाठविण्यासाठी दिलेल्या पार्सलमध्ये एम.डी. नावाचे ड्रग्ज सापडले आहे. तसेच तुमच्या नावे अनेक पासपोर्ट व एटीएम आहेत’ असे सांगून समोरील व्यक्तीने तो कस्टम अधिकारी असल्याचे सांगितले. यानंतर पुन्हा सीबीआय अधिकारी बोलत असल्याचे सांगून दुसऱ्या व्यक्तीने तुम्ही केलेला गुन्हा अत्यंत गंभीर असून, हे प्रकरण मिटविण्यासाठी २० लाख रुपये द्यावे लागतील, असे बजावले.
नवोदिता घाटगे यांनी घाबरलेल्या अवस्थेत त्यांच्या बॅंक खात्यांची माहिती दिली. तोतया अधिकाऱ्यांनी घाटगे यांच्या बचत खात्यातून २० लाखांची रक्कम जबरदस्तीने वर्ग करून घेतली. ही रक्कम एम. एम. एंटरप्रायजेस, आरव प्लाझा, काला टोल बाजार असा पत्ता असलेल्या बॅंकांच्या खात्यावर स्वीकारण्यात आली.
शाहूपुरी पोलिसांनी संशयित अनिल यादव, अजित (पूर्ण नाव समजू शकलेले नाही) या दोघांवर गुन्हा दाखल केला. तसेच घाटगे यांना आलेले मोबाईल क्रमांक, बॅंक खात्यांचा तपशील तातडीने सायबर पोलिसांकडे देण्यात आले आहेत. सायबर पोलिसही या प्रकरणाचा समांतर तपास करणार आहेत.