नोकरीच्या आमीषाने फसवणूक
करणारा वायचळ वर्षभरापासून पसार
सकाळ वृत्तसेवा
कोल्हापूर, ता. ४ : सरकारी कार्यालये, बॅंकांमध्ये नोकरीच्या आमीषाने २९ लाखांची फसवणूक करणाऱ्या सचिन शरद वायचळ (रा. सनगर गल्ली, मंगळवार पेठ, कोल्हापूर) याचा शोध जुना राजवाडा पोलिस घेत आहेत. बेळगाव येथील कार्यालय बंद करून पसार झालेला वायचळ कोल्हापुरातील घराकडेही वर्षभर फिरकला नसल्याची माहिती समोर आली आहे. पोलिसांनी मंगळवार पेठेत त्याची माहिती घेण्याचे काम सुरू केले आहे.
हिंडलगा (जि. बेळगाव) येथील सेवानिवृत्त शिक्षक सूर्याजी नारायण ओऊळकर (वय ७०) यांनी मुलगा, दोन मुली, जावई यांना कोल्हापुरातील वेगवेगळ्या सरकारी कार्यालयात नोकरी लावण्यासाठी वायचळला २९ लाख ८८ हजारांची रक्कम दिली आहे. जुलै २०१६ ते ऑक्टोबर २०२२ या कालावधीत त्याने बॅंक आरटीजीएसद्वारे ही रक्कम स्‍वीकारली आहे. चंदगड तलाठी, कोल्हापूर जिल्हा परिषदेत किंवा नामांकित बॅंकांमध्ये नोकरीला लावण्याचे आश्वासन दिले होते; परंतु त्याच्याकडून टाळाटाळ सुरू झाल्याने आपली फसवणूक झाल्याचे ओऊळकर यांच्या लक्षात आले. यानंतर त्यांनी जिल्हा न्यायालयाकडे दाखल केलेल्या तक्रारीवरून न्यायालयाने गुन्हा दाखल करून तपासाचे आदेश जुना राजवाडा पोलिसांना दिले आहेत. पोलिस उपनिरीक्षक संतोष गळवे अधिक तपास करत आहेत.