लोकसभेत नाही; पण विधानसभेत सत्तापालट
खासदार अरविंद सावंत यांचा दावा ः श्री अंबाबाईचे सपत्नीक घेतले दर्शन

सकाळ वृत्तसेवा
कोल्हापूर, ता. ९ ः लोकसभेत धक्का दिला आहे. मात्र, जितका पाहिजे तितका लागलेला नाही. तेथेच सत्तापालट व्हायला हवा होता. लोकसभेत नाही मात्र विधानसभेला नक्की होईल, असे स्पष्ट मत आज खासदार अरविंद सावंत यांनी आज माध्यमांशी बोलताना सांगितले. त्यांनी आज दुपारी सपत्नीक कोल्हापुरात येऊन करवीर निवासिनी अंबाबाई देवीचे दर्शन घेतले.
राज्यपातळीवरील प्रश्‍नावर खासदार सावंत म्हणाले, ‘लोकसभेतच सत्तांतर व्हायला हवे होते. तेथे जितका धक्का दिला तितका लागलेला नाही. त्यामुळे आता लोकसभेत नाही, तर विधानसभेत नक्कीच सत्तापालट होईल. त्या दृष्टीने उद्धव ठाकरे, शरद पवार, सोनिया गांधी, राहुल गांधी यांच्या नेतृत्वाखाली महाविकास आघाडी म्हणून सर्वजण कामाला लागलेले आहेत. परिवर्तन नक्की घडणार आहे. तिसरी आघाडी वगैरे भाष्य करून आपण त्यांना मोठं करतोय. ते छोटे आहेत छोटेसेच राहू दे. सध्या विधान परिषदेची निवडणूक सुरू आहे. तेथे उद्धव ठाकरे शिवसेनेचे मिलिंद नार्वेकर अपेक्षेपेक्षा जास्त मते घेऊन निवडून येतील. तसेच वाघ नख्यांसंदर्भात म्युझियमने जे कळवलेले आहे की आम्ही त्याबद्दल अनभिज्ञ आहोत. ती वाघनखे घालून छत्रपती शिवाजी महाराज यांनी अफजलखानाचा कोथळा काढला, तीच ही वाघ नखे आहेत का? याबद्दल आमच्या मनातही अनिश्चितता आहे.’
खासदार सावंत यांच्यासोबत सहसंपर्क प्रमुख विजय देवणे व निवडक पदाधिकारी उपस्थित होते. खासदार सावंत यांनी काही पदाधिकाऱ्यांशीही संवाद साधला.

चौकट
‘त्यांच्या’वर काय कारवाई झाली?
हिट अँड रन प्रकरणांमध्ये कारवाई होईल, असे वाटत नाही. धनाढ्य आणि राजकारण्यांना हा सत्तेचा उन्माद आलेला आहे. जेव्हा एखादा आमदार पोलिसांना शिवीगाळ करतो किंवा थप्पड मारतो, दुसरा आमदार हातपाय तोडा आणि माझ्याकडे या, मी ऑनटेबल जामीन देतो, असे म्हणतो, तिसरा आमदार थेट पोलिस ठाण्यात जाऊन गोळ्या घालतो. त्यांच्यावर काय कारवाई झाली?