कोल्हापूर, ता. ५ ः खासगी सावकारांच्या त्रासाला कंटाळून जरगनगरातील एका तरुणाने विषारी द्रव्य प्राशन करून महावीर गार्डन परिसरात आत्महत्येचा प्रयत्न केला. आज सायंकाळी सव्वापाच वाजण्याच्या सुमारास हा प्रकार घडला. त्याला उपचारासाठी सीपीआर रुग्णालयात दाखल करण्यात आले. त्याने विषारी द्रव्य प्राशन करण्यापूर्वी शहरातील पाच खासगी सावकारांविरोधात लिहिलेली चिठ्ठी पोलिसांना सापडली आहे. या प्रकाराची सीपीआर पोलिस चौकीमध्ये नोंद झाली असून, रात्री उशिरापर्यंत शाहूपुरी पोलिस ठाण्यात गुन्हा नोंद करण्याची प्रक्रिया सुरू होती.

पोलिसांनी सांगितले की, संबंधित युवकाने महावीर गार्डन परिसरात विषारी द्रव्य प्राशन केले. त्यावर त्याला त्रास होत असल्याचे काही नागरिकांना दिसून आले. नागरिक आणि मित्राने त्याला उपचारासाठी सीपीआर रुग्णालयात दाखल केले. त्याची माहिती मिळताच तेथे पोलिस आले. त्यांनी याबाबत संबंधित तरुणाला भेटून त्याच्याकडून झालेल्या प्रकाराबाबतची माहिती घेतली. त्यावेळी त्यांना या तरुणाजवळ पाच खासगी सावकारांबाबत लिहिलेली एक चिठ्ठी सापडली.

त्यामध्ये त्याने या सावकारांची नावे आणि त्यांच्याकडून किती पैसे घेतले. त्यापैकी किती पैशांची परतफेड केली हे नमूद केले आहे. तरीही या सावकारांकडून जादा पैशांसाठी तगादा लावून त्रास दिला जात आहे. एका सावकाराने माझी गाडी घेतली आहे. गेल्या दहा ते बारा वर्षांपासून हे सावकर मला त्रास देत आहेत. त्याच्या त्रासाला आणि कर्जाला कंटाळून आत्महत्या करत असल्याचा उल्लेख त्याने चिठ्ठीत केला आहे. दरम्यान, शाहूपुरी पोलिस त्याचा जबाब घेत आहेत. त्यामुळे रात्री उशिरापर्यंत गुन्हा नोंद करण्याची प्रक्रिया सुरू होती. या तरुणाची प्रकृती स्थिर असल्याचे पोलिसांनी सांगितले.