पुलाची शिरोलीच्या सरपंचांसह सदस्यांवर गुन्हा

विनापरवाना घोडागाडी शर्यतीप्रकरणी कारवाई

नागाव, ता. १४ : विनापरवाना घोडागाडी शर्यतीप्रकरणी पुलाची शिरोलीचे सरपंच, उपसरपंचांसह ग्रामपंचायत सदस्यांवर गुन्हा दाखल झाला आहे. शिरोली येथील उरूस व यात्रेनिमित्त या शर्यतींचे आयोजन करण्यात आले होते. घोडागाडी शर्यतीत घोड्यांना अमानुष मारहाण करण्यात आली आहे. शिवाय शर्यतीत धावणारा एक घोडा पाय घसरून पडल्यामुळे घोडागाडी उलटली. त्यामुळे घोडागाडीपाठोपाठ मोटारसायकलवरून पाठलाग करणाऱ्या‍ शौकिनांपैकी दोघे मोटारसायकलस्वार जखमी झाले.
याबाबत प्राणीमित्र संघटनेच्या कार्यकर्त्यांनी आक्षेप घेत कारवाईची मागणी केली. त्यानुसार विनापरवानगी घोडागाडी शर्यती घेतल्याप्रकरणी शिरोली पोलिस ठाण्यात उरूस व यात्रा कमिटीच्या विरोधात आज सायंकाळी गुन्हा दाखल करण्यात आला. एकूण २३ जणांविरुद्ध गुन्हा दाखल झाला आहे.
पुलाची शिरोलीत उरूस व यात्रेनिमित्त यात्रा कमिटीच्यावतीने इचलकरंजी प्रांताधिकारी यांची परवानगी घेऊन बैलगाडी शर्यती घेण्यात आल्या. पण, त्यानंतर काही घोडा शौकिनांनी घोडागाडी शर्यती घेतल्या. या शर्यतीसाठी प्रांताधिकारी इचलकरंजी यांची परवानगी घेण्यात आली नव्हती.
या शर्यतीवेळी घोड्यांना लोकांकडून निर्दयपणे वागणूक व अमानुषपणे मारहाण करण्यात आली. तसेच घोड्याचा पाय घसरून दोन घोडागाड्यांचा अपघात झाला. या अपघातात घोडी व संदीप तात्यासो संकपाळ हा मोटारसायकलस्वार जखमी झाला. या अपघाताचा व्हिडिओ सोशल मीडियावर व्हायरल झाला होता.
त्याअनुषंगाने आज सकाळी कोल्हापूर येथील काही संघटनांच्या पदाधिकाऱ्यांनी वरिष्ठ पोलिसांची भेट घेऊन चौकशीची मागणी केली. सायंकाळी साडेचार वाजता करवीरचे उपविभागीय पोलिस अधिकारी यांनी शिरोली पोलिस ठाण्यात भेट देऊन घटनेची माहिती घेतली. तपासात घोडागाडी शर्यतीची परवानगी घेतली नसल्याचे स्पष्ट झाले. त्यामुळे पोलिस कर्मचारी नीलेश मच्छिंद्र कांबळे यांनी फिर्याद दिली. सहायक पोलिस निरीक्षक पंकज गिरी यांच्या मार्गदर्शनाखाली तपास सुरू आहे.