पन्हाळ्यातील ९ भुस्खलनप्रवण
परिसरातील गावांना सतर्कतेचा इशारा

पन्हाळा, ता.२६ः तालुक्यात मागील चार वर्षांपासून सातत्याने भुस्खलनाच्या घटना घडत आहेत. त्या अनुषंगाने तालुक्यातील नऊ ठिकाणे भुस्खलन प्रवणक्षेत्र म्हणून घोषित केली आहेत. या भुस्खलन प्रवणक्षेत्र परिसरात येणाऱ्या गावांना पन्हाळा तहसीलदार माधवी शिंदे -जाधव यांनी सतर्कतेचा इशारा दिला आहे.
भुस्खलनामुळे होणारा संभाव्य धोका टाळण्यासाठी प्रशासन सतर्क झाले आहे. तालुक्यातील बादेवाडी डोंगर, पोहाळवाडी डोंगर, गिरोली जोतिबा डोंगर, पावनगड डोंगर, मंगळवार पेठ ते पन्हाळा डोंगर, बुधवार पेठ परिसर मुख्य रस्ता, मराठवाडी, म्हाळुंगे ॲडव्हेंचर पार्क, आपटी ही नऊ ठिकाणे भुस्खलन प्रवणक्षेत्र घोषित केली आहेत. या नऊ ठिकाणच्या परिसरात येणाऱ्या गावातील नागरिकांना तहसीलदारांनी सतर्कतेचा इशारा दिला आहे. भुस्खलनामुळे कोणत्याही प्रकारे जीवित वा वित्तहानी होऊ नये म्हणून तलाठी, कोतवाल, पोलिस पाटील यांना सूचना दिल्या आहेत. त्यांच्याकडून प्राप्त होणाऱ्या अहवालानुसार उपाययोजना करण्यासाठी प्रशासन सज्ज असल्याचे तहसीलदार माधवी शिंदे यांनी सांगितले.