नात्यातील चार मुलींना घेऊन
विवाहित महिला बेपत्ता
पेठवडगाव, ता. २३ : मैत्रिणीकडे जातो असे सांगून विवाहित महिला नात्यातील चार मुलींना घेऊन बेपत्ता झाल्याची घटना घडली. एकाच कुटुंबातील पाच सदस्यांपैकी दोन वर्षांच्या मुलीसह तीन अल्पवयीन मुली बेपत्ता झाल्यामुळे खळ-बळ उडाली आहे.
सौ. काजल राकेश जाधव (वय २५), त्यांची मुलगी नायरा (२), पुतणी नेहा लक्ष्मण जाधव (१५), तिची बहिण अर्पिता (१४), चुलत बहीण शीतल दिलीप जाधव (१६, सर्व रा. सध्या मिणचे, मूळ गाव निगडेवाडी, उचगाव, करवीर) अशी बेपत्ता झालेल्यांची नावे आहेत.
वडगाव-मिणचे रोडवर मिणचे हद्दीत वसंत जाधव यांचा विटभट्टी व्यवसाय आहे. राकेश सावकार जाधव (२६) हे कुटुंबासह मजूर म्हणून कामास आहेत. दुपारी साडेबाराच्या सुमारास त्यांची पत्नी काजल या मैत्रीण मीना पोवार यांच्याकडे जाऊन येतो असे सांगून गेल्या. त्यांच्यासोबत लहान मुलगी व तीन मुली नेहा, अर्पिता, शीतल यांनाही त्या सोबत घेऊन गेल्या. त्या रात्री उशिरापर्यंत परत आल्या नाहीत. म्हणून राकेश यांनी तिच्या मैत्रिणीस संपर्क केला असता त्या नसल्याचे उघडकीस आले. नातेवाईकांनी शोधा-शोध करूनही त्यांचा शोध लागला नाही. त्यामुळे त्यांनी रात्री उशिरा वडगाव पोलिस ठाण्यात वर्दी दिली. बेपत्ता होण्याचे कारण समजू शकलेले नाही. त्यामुळे पोलिस त्यांचा युद्धपातळीवर शोध घेत आहेत.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.