04697
अनुदानाच्या जाचक अटींपासून मुक्त करा
अरुणकुमार डोंगळे : कसबा ठाणेत गोकुळचा मेळावा

सकाळ वृत्तसेवा
पुनाळ, ता. २ : गायीच्या दुधावरील अनुदानानिमित्त सभासदांवर लादलेल्या जाचक अटी रद्द करण्याची मागणी गोकुळ दूध संघाचे अध्यक्ष अरुणकुमार डोंगळे यांनी केली. कसबा ठाणे(ता. पन्हाळा) येथील गुरुकृपा कार्यालयातील पन्हाळा-शाहुवाडी तालुका दूध संस्था सचिव, अध्यक्ष, पदाधिकाऱ्यांच्या मेळाव्यात ते अध्यक्षस्थानावरुन बोलत होते.
अरुणकुमार डोंगळे म्हणाले, ‘दुग्धविकासमंत्री राधाकृष्ण विखे-पाटील यांनी दूध उत्पादकांच्या खात्यावर प्रतिलिटर पाच रुपये अनुदान जमा करण्याचे विधिमंडळात जाहीर केले. पण अनुदान देताना जाचक अटी घातल्या. त्यामुळे अनुदानापासून सभासद वंचित राहणार असल्याने अटी रद्द करण्याची मागणी मेळाव्यात झाली. ज्या सभासदांच्या गाईचे दुधाचे फॅट ३.२ व ८.३ व एसएनएफसाठी २९ रुपये दर दूध उत्पादक सभासदांच्या वैयक्तीक खात्यामध्ये जमा होणार आहे. यासाठी दूध उत्पादक सभासदांचे बँक खाते त्यांच्या आधार कार्ड व पशुधन इअर टॅगींगशी लिंक असणे बंधनकारक आहे. अशा जाचक अटी दूध उत्पादक सभासदांना घालण्यात आल्याने अनुदान शेतकऱ्यांच्या खात्यावर जमा होणार नाही. परिणामत: सभासदांना आर्थिक नुकसान होणार आहे.’ यावेळी गोकुळचे संचालक अजित नरके, बयाजी शेळके, चेतन नरके, अमरसिंह पाटील आदींनी मनोगत व्यक्त केले. कार्यक्रमाला पन्हाळा - शाहूवाडीतील दूध उत्पादक सभासद, ग्रामस्थ उपस्थित होते.