भाजी विक्रेत्या महिलेवर
व्यवसाय वादातून खुरप्याने वार

सेनापती कापशी, ता. १०: येथील आक्काताई तानाजी शिंदे (वय ५५) या भाजी विक्रेत्या महिलेवर व्यवसायाच्या वादातून खुनी हल्ला करण्यात आला. ही महिला गंभीर जखमी असून त्यांच्यावर कोल्हापूर येथील सीपीआरमध्ये उपचार सुरू आहेत. संशयित हल्लेखोर शंकर कृष्णा माळी (रा. सेनापती कापशी, वय ७५) याला मुरगूड पोलिसांनी ताब्यात घेतले आहे. ही घटना आज पहाटे साडेचारच्या सुमारास घडली.
घटनास्थळ व पोलिसांतून मिळालेली माहिती अशी, आक्काताई शिंदे व शंकर माळी यांचा येथील संताजीनगर चौकात भाजी विक्रीचा व्यवसाय आहे. आज सकाळी हे दोघे निपाणीकडे एकाच वाहनातून सौद्याच्या भाजीपाला खरेदीला निपाणीकडे जात होते. या दोघांत खूप दिवसांपासून भाजी विक्रीच्या जागेचा वाद व ग्राहक मिळवण्याची चढाओढ होती. वाहनातून जात असताना दोघांमध्ये वादाला सुरवात झाली. वाद वाढतच गेला. माळी यांनी कुडिटेक जैन्याळ येथे गाडी आली असताना शिंदे यांच्यावर खुरप्याने वार करुन जखमी केले. शिंदे या गंभीर जखमी झाल्याने सीपीआरमध्ये उपचारासाठी दाखल केले आहे. अधिक तपास सहायक पोलिस निरीक्षक विकास बडवे यांच्या मार्गदर्शनाखाली पोलिस उपनिरीक्षक वाघमारे, हवालदार नारायण देसाई, संदीप ढेकळे, अमर पाटील, राहुल देसाई आदी करत आहेत.