राधानगरी इको पर्यटन क्षेत्राचा
विकास आराखडा काम जोमाने
राधानगरी, ता. ३१ : राधानगरी अभयारण्य आणि धरण व त्याच्या सभोवतालच्या क्षेत्राचा इको-पर्यटन क्षेत्र म्हणून विकास करण्यासाठी नियुक्त विशेष नियोजन प्राधिकरणाने एकात्मिक पर्यटन विकास आराखडा तयार करण्याचे काम जोमाने सुरू केले आहे.
अधिसूचित विशेष नियोजन प्राधिकरण क्षेत्राच्या हद्दीत ८४ गावे समाविष्ट आहेत. या क्षेत्राचा भू वापर नकाशा तयार करण्याचे काम अंतिम टप्प्यात आले आहे. आगामी एक-दोन महिन्यांत नकाशा प्रकाशित केला जाणार आहे. नकाशा प्रकाशित झाल्यानंतर प्राधिकरणाकडून प्रारूप विकास आराखडा तयार करण्याचे काम सुरू होणार आहे. राज्य शासनाने महाराष्ट्र राज्य रस्ते विकास महामंडळाची विशेष नियोजन प्राधिकरण म्हणून २०२३ मध्ये नियुक्ती केली आहे. तब्बल वर्षभरानंतर पहिल्या टप्प्यातील आवश्यक सर्वेक्षण होऊन, भू वापर नकाशा तयार करण्याच्या कामाने गती घेतली. राधानगरी अभयारण्य व धरणांच्या क्षेत्रात पर्यटन विकासाच्या दृष्टीने मोठा वाव आहे. यामुळे वन्यजीव, वृक्षसंपदा जतन, संवर्धन आणि संरक्षण स्थानिकांसाठी शाश्वत आणि पर्यावरणपूरक विकास साधणे. पर्यटन क्षमतेचा उपयोग करून, त्याच्या वाढीला चालना देणे. आदी बाबींचा प्रस्तावित पर्यटन विकास आराखड्यात समावेश असेल. लवकरच भू वापर नकाशा आणि प्रारूप विकास आराखडा तयार होऊन हरकती व सूचनांसाठी प्रसिद्ध करण्याचे प्राधिकरणाकडून सूचित झाले आहे.