राधानगरी : राधानगरी तालुक्यात यंदाच्या खरीप हंगामात १४ हजार ९५६ हेक्टर क्षेत्रात खरीप पिकांची लागवड होणार आहे. तालुक्यात उसापाठोपाठ खरीप हंगामातील भात पीक क्षेत्र सर्वाधिक आहे.

खरीप हंगामपूर्व शेती मशागतीची कामे पूर्ण झाली असून, पूर्व भागातील काही क्षेत्रात धूळवाफ पेरणी व भात टोकनणी झाली आहे. तालुक्यात पूर्व भागात टोकण, तर पश्चिम भागात रोप लावण पद्धतीने भात पीक घेतले जाते. मॉन्सूनची चाहूल लागल्याने सध्या पेरणीची पूर्वतयारी सुरू आहे. वळीव पाऊस पेरणीस उपयुक्त ठरला आहे.

पारंपरिक भात बियाण्यांबरोबरच संकरित बियाणे वापरावरही शेतकऱ्यांचा भर आहे.
यंदाच्या खरीप हंगामात भात १२,१५०, भुईमूग १२१०, नागली १७७०, सोयाबीन ४०, तूर ४५ आणि उडीद ५० हेक्टर असे पीकवार उद्दिष्ट कृषी विभागाने निश्चित केले आहे.

खरीप हंगामपूर्व आढावा बैठकीनंतर कृषी विभागाने खरीप हंगामासाठी सर्व सज्जता केली आहे. खते, बियाण्यांची पुरेशी उपलब्धता आहे. आवश्यक बियाणे, खतांचा तुटवडा भासणार नाही, याची विशेष दक्षता घेतली आहे. हवामान खात्याच्या अंदाजानुसार मॉन्सून वेळेत सुरू होणार असल्याने यंदाचा खरीप हंगाम शेतकऱ्यांसाठी समाधानकारक ठरेल.

-अरुण मगदूम, कृषी अधिकारी, पंचायत समिती राधानगरी