आजरा : आजऱ्यातील एका युवकाचे आपल्या मुलीशी लग्न (Marriage) होऊ नये म्हणून जादूटोणा व अघोरी प्रकाराचा अवलंब केल्याप्रकरणी आजरा पोलिसात (Ajara Police Station) भोंदूबाबासह तिघांच्या विरोधात गुन्हा नोंद झाला आहे. भोंदूबाबा व रेश्मा बुगडे, शामराव बुगडे (रा. मलिग्रे, ता. आजरा) सुनील निऊंगरे कागिनवाडी (ता. आजरा) अशी त्यांची नावे आहेत.

राहुल पोवार यांने आजरा पोलिसात फिर्याद दिली आहे. फिर्यादीत म्हटले आहे, की राहुल पोवारचे एका मुलीशी दीड वर्षापासून प्रेमसंबंध होते. संबंधित मुलीला राहुलच्या नातेवाईकांनी लग्नासाठी मागणी घातली होती. मात्र, त्याला नकार दिला. काहीतरी कामधंदा कर मग लग्नाचे बघू असे सांगितले.

दरम्यान, सुनील निउंगरे हे एका भोंदूबाबाच्या मदतीने जादूटोण्याचा प्रकार करू लागले. त्याचाच एक भाग म्हणून २९ सप्टेंबरला रात्री ९.३० वाजता गावातील स्मशानभूमीत जाऊन काहीतरी पुरल्याचे फिर्यादीच्या मित्रांनी राहुलला सांगितले. राहुलने स्मशानभूमीत जाऊन पाहिल्यावर संबंधित युवती व स्वतःचा फोटो, जादूटोण्याचे साहित्य ठेवल्याचे दिसले.

त्यानंतर पुन्हा २८ आक्टोबरला रात्री ८ वाजता कोवाडे मार्गावर मरगूबाई मंदिरालगतच्या जंगलात जादूटोण्याचे साहित्य झाडाला टांगल्याचे दिसले. यावर पोवार यांने आजरा पोलिसात जाऊन संबंधितावर तक्रार दिली आहे. सहायक पोलिस निरीक्षक सुनील हारुगडे यांच्या मार्गदर्शनाखाली पोलिस अधिक तपास करीत आहेत.