शाहूवाडी : ‘शिवभक्तांवर नको तर माझ्यावरच गुन्हा दाखल करा’, अशी मागणी करत युवराज संभाजीराजे छत्रपती (Sambhaji Raje Chhatrapati) यांनी शाहूवाडी पोलिस ठाण्यात (Shahuwadi Police Station) तब्बल अडीच तास ठिय्या मारला. पोलिस प्रशासनाकडून (Kolhapur Police) काहीच प्रतिक्रिया न देता मौन बाळगले गेल्याने ते पुन्हा कोल्हापूरला परतले.

रविवारी (ता. १४) गजापूर व विशाळगडावर झालेल्या वाहनांची मोडतोड व जाळपोळीच्या घटनेने तणावाचे वातावरण राहिले. युवराज संभाजीराजे छत्रपती यांच्यावर गुन्हा दाखल झाल्याचे मेसेज सोशल मीडियावर व्हायरल झाले. संभाजीराजे यांनी तातडीने शासकीय विश्रामगृह येथे पत्रकार परिषद घेऊन त्यांची भूमिका स्पष्ट केली.

पत्रकार परिषद सुरू असताना गुन्हा दाखल झाला आहे का, अशी विचारणा झाली. त्यावर त्याची माहिती करून घेण्यासाठी शाहूवाडी पोलिस ठाण्यात जाण्याची तयारी करत असल्याचे संभाजीराजे यांनी स्पष्ट केले. काही वेळ शिवभक्तांशी चर्चा करून ते थेट शाहूवाडी पोलिस ठाण्याच्या दिशेने रवाना झाले. संभाजीराजे ठाण्यात येत असल्याचे समजताच परिसरात पोलिस बंदोबस्त तैनात करण्यात आला होता. संभाजीराजे यांनी ठाण्यात शिवभक्तांसमवेत जाऊन पोलिस प्रशासनाशी चर्चा करून गुन्हा दाखल झाला असेल तर अटक करा, असा पवित्रा घेतला.

पोलिस उपअधीक्षक आप्पासाहेब पवार यांच्यासमोर ते बसून राहिले. त्यांच्याकडून गुन्ह्याबाबत काहीच प्रतिसाद न मिळाल्याने ते ठाण्यातून बाहेर पडले. माध्यम प्रतिनिधिंशी संवाद साधताना ते म्हणाले, ‘मुस्लिम बोर्डिंग व आमच्या घराण्याचे नाते वेगळे आहे. कालच्या मोहिमेत पन्नास ते साठ मुस्लिम बांधव सोबत होते. गडावर दोन्ही बाजूंची अतिक्रमणे आहेत ती काढावीत, अशी आमची मागणी असून, आता काढण्यात आलेली अतिक्रमणे हिंदूंची आहेत.