कोल्हापूर : राष्ट्रवादी काँग्रेस पक्षात (NCP) फूट पडल्यानंतर कोल्हापूर महागरपालिकेतील (Kolhapur Municipal Corporation) राष्ट्रवादी काँग्रेसच्या माजी नगरसेवकांत कमालीची अस्वस्थता निर्माण झाली आहे.

या विचित्र मानसिकतेतून बाहेर पडून कोणाचे नेतृत्व मानायचे, हा प्रश्न त्यांच्यासमोर निर्माण झाला आहे. सध्यातरी या सर्वांनी शांतपणे बसणेच पसंत केले आहे.

पक्षफुटीमुळे नेत्यांना प्रोत्साहन देणाऱ्या, नेत्यांसाठी, पक्षासाठी राबणाऱ्या कार्यकर्त्यांना फुटल्यामुळे तीव्र दु:ख झाले आहे. अशीच अवस्था कोल्हापूर महानगरपालिकेच्या माजी नगरसेवकांची झाली आहे.

एकीकडे शरद पवारांशी निष्ठा तर दुसरीकडे हसन मुश्रीफ यांच्यावर श्रद्धा असताना राष्ट्रवादी फुटल्यामुळे या माजी नगरसेवकांना प्रचंड धक्का बसला आहे. जे काही घडले ते अकल्पित घडले असल्याने त्यावर भाष्य करणे किंवा कोणा एकाची बाजू घेणे कार्यकर्त्यांनी जाणीवपूर्वक टाळले आहे किंवा ते मतप्रदर्शन करण्याच्या मनस्थितीत दिसत नाहीत.

मंत्री हसन मुश्रीफ यांनी नगरसेवकांना महापालिकेच्या कामकाजात बरीच मदत केली आहे. त्यामुळे त्यांच्या भोवती नगरसेवकांचे एक वर्तुळ तयार झाले होते. जास्तीत जास्त नगरसेवक निवडून आणण्याचा प्रयत्न आठ-दहा माजी नगरसेवक गेल्या वर्षभरापासून करत आहेत. त्यांना मुश्रीफ यांचे पक्ष पाठबळ आहे.

परंतु, आता भाजपसोबत जाण्याचा निर्णय माजी नगरसेवकांना रुचलेला नाही. जयंती नाला जसा प्रदूषित झाला आहे, तसे गेल्या चार वर्षांत महाराष्ट्रातील राजकारणही प्रदूषित झाले असल्यामुळे महापालिकेची निवडणूक लढवावी की नको, असा विचार निष्ठेचे तसेच वैचारिक राजकारण करणाऱ्यांकडून केला जाऊ लागलाय.