कोल्हापूर : फेसबुकवर (Facebook) झालेल्या ओळखीतून महिलेला जबरदस्तीने मैत्रीसाठी भाग पाडणाऱ्या पोलिस कॉन्स्टेबलने (Police Constable) घरात घुसून धिंगाणा केल्याची तक्रार पोलिस अधीक्षक कार्यालयाकडे केली आहे. अझरुद्दीन खतिफ (रा. हेर्ले, ता. हातकणंगले) असे त्या पोलिसाचे नाव आहे.

मंगळवारी दुपारी पीडित महिलेच्या घरात हा प्रकार घडला. खतिफकडून कुटुंबीयांना धोका असल्याचेही त्या महिलेने तक्रार अर्जात म्हटले आहे. खतिफ हा गोकुळ शिरगाव पोलिस ठाण्यात (Gokul Shirgaon Police Station) कार्यरत आहे. त्याची फेसबुकवरून संबंधित महिलेशी ओळख झाली होती. त्यानंतर त्याने या महिलेला मैत्री ठेवण्यासाठी धमकावले.

याला नकार देताच चिडून तिच्या घरात घुसून शिवीगाळ केली. महिलेसह तिच्या मुलांना, आईला जिवे मारण्याची धमकी दिल्याने तिने शिरोली एमआयडीसी पोलिस ठाण्याकडे तक्रार अर्ज दिला होता. मात्र, कारवाई न झाल्याने तिने बुधवारी पोलिस अधीक्षक महेंद्र पंडित यांच्याकडे निवेदन दिले.