बिद्री (कोल्हापूर) : घरातील कचरा पेटविताना त्यामध्ये पडलेल्या सॅनिटायझरच्या बाटलीचा स्फोट होऊन जखमी झालेल्या महिलेचा मृत्यू झाला. बोरवडे (ता. कागल) येथे ही घटना घडली. सुनीता धोंडिराम काशीद (वय ४०, रा. बोरवडे, दत्तनगर) असे मृत महिलेचे नाव आहे.

याबाबत सविस्तर माहिती अशी, सुनीता काशीद या २७ डिसेंबर रोजी सायंकाळी ५.३० च्या सुमारास घरातील कचरा अंगणात पेटवित होत्या. त्यामध्ये पडलेल्या सॅनिटायझरच्या बाटलीचा अचानक स्फोट झाला व बाटलीतील सॅनिटायझर त्यांच्या अंगावर फेकले गेले. त्यात त्यांच्या साडीने पेट घेतला. 

हेही वाचा - कळंबा कारागृह प्रशासनाचा सुरक्षेवर भर ;मोबाईलच्या पडद्यामागचा चार्जर शोधण्याचे आव्हान -

यामध्ये त्या ऐंशी टक्के भाजून गंभीर जखमी झाल्या होत्या.
घरातील व शेजारी लोकांनी आग विझवून त्यांना पुढील उपचारासाठी सीपीआर रुग्णालयात दाखल केले. गेले आठवडाभर त्यांच्यावर सीपीआरमध्ये उपचार सुरू होते. शनिवारी (२) रात्री उशिरा त्यांचा मृत्यू झाला. घटनेची नोंद सीपीआर पोलिस चौकीत झाली आहे. ग्रामसेवक धोंडिराम काशीद यांच्या त्या पत्नी होत. सुनीता काशीद यांच्या झालेल्या आकस्मिक मृत्यूमुळे परिसरात हळहळ व्यक्त होत आहे.

संपादन - स्नेहल कदम