मुरगूड ( कोल्हापूर ) - कागल - निढोरी राज्यमार्गावर व्हराड गायब झालेल्या मंदिराजवळ आज पहाटे साडे सहा वाजण्याच्या सुमारास बिबट्याचे दर्शन झाले.

याबाबत मिळालेली अधिक माहिती अशी, आज सकाळी साडे सहा वाजण्याच्या सुमारास मुरगूड नगरपरिषदेचे कर्मचारी अमर कांबळे हे मुरगूडहून कागलच्या दिशेने कामानिमित्त मोटरसायकलवरुन जात होते. यावेळी त्यांना  कागल - निढोरी राज्यमार्गालगत असणाऱ्या व्हराड गायब झालेल्या मंदिराच्या समोर बिबट्याचे दर्शन झाले. रस्त्यापासून अवघ्या थोड्या अंतरावरच  बिबट्या त्यांना दिसला अशी माहिती त्यांनी दिली. बिबट्याला रस्तालगत पाहताच त्यांची घाबरगुंडी उडाली आहे. स्वतःला सावरत त्यांनी तातडीने तेथून पळ काढला. कागलच्या दिशेने ते मोटारसायकलवरून वेगात निघून गेले.  

हेही वाचा - सुखद ! निराधार आजीला मिळाले घर, अन् नात.. 

मुरगुड परिसरात गव्याचेही दर्शन

दरम्यान शनिवारी ( ता.23 ) रात्री साडेनऊ वाजण्याच्या सुमारास मुरगूड (ता. कागल ) येथील अनिकेत रामाने व संदीप सुतार हे दोघे कागलहून मुरगूडच्या दिशेने निघाले होते. यावेळी त्यांना भडगाव पाटीनजीक रस्त्याच्या मध्यभागीच पूर्ण वाढ झालेल्या गवा रेड्याचे दर्शन झाले होते. गव्याच्या दर्शनाने परिसरात भितीचे वातावरण होते. आता त्यात बिबट्याच्या वावरामुळे अधिकच भर पडली आहे. हा परिसर लोकांच्या वर्दळीचा व नागरी वस्तीचा आहे. शिवाय परिसरात ऊस शेती मोठ्या प्रमाणावर आहे. शेतकरी रात्री अपरात्री उसाला पाणी पाजण्यासाठी शेतात जात असतात. त्यामुळे बिबट्या व गवा रेड्याच्या वावराने हा परिसर भितीच्या छायेखाली आला आहे. वनविभागाने तात्काळ या परिसरात गवारेडा व बिबट्यासाठी शोध मोहिम राबवावी अशी मागणी नागरीकांनी केली आहे.

हेही वाचा - कोल्हापूरहून मुंबईला जाणारे विमान का करावे लागले रद्द ? 

मळगे पाटीजवळ दर्शन

आज सकाळी साडेसहाच्या सुमारास मी मोटरसायकलवरुन कोल्हापूरला परिक्षेसाठी जात होतो. मळगे पाटीजवळ असणाऱ्या मंदिराच्या पुढच्या बाजूला रस्त्याच्या कडेलाच अचानक बिबट्या असल्याचे दिसले. मी भांबावून गेलो व गाडी आहे त्याच वेगाने चालवत पुढे गेलो.
 - अमर कांबळे, मुरगूड