संख : भिवर्गी (ता. जत) येथे विवाहितीने दोन मुलांसह विहिरीत उडी टाकून आत्महत्या केली. राजाक्का धर्मराय बिराजदार (वय २८), मुलगा विष्णू धर्मराय बिराजदार (वय ५), माधुरी धर्मराय बिराजदार (वय २) अशी तिघांची नावे आहेत. ही घटना दुपारी ३ वाजता पांडोझरी ओढ्यावरील विहिरीत घडली. आत्महत्येचे नेमके कारण अस्पष्ट आहे.

पोलिसांकडून (Umadi Police Station) मिळालेली माहिती अशी, जत पूर्व भागातील भिवर्गी येथील बिळ्यानसिद्ध मंदिराच्यामागे धर्मराय साताप्पा बिराजदार आई, वडील, पत्नी, मुलांसमवेत राहतात. गावात धर्मराय बिराजदार यांचे दूध संकलन केंद्र आहे. घरातून शनिवारी दुपारी राजाक्का पाणी आणण्यास घागर घेऊन गेली होती. मुलगा विष्णू, मुलगी माधुरी सोबत होते. घरात मुले नसल्याने शोधाशोध केली, मात्र आढळली नाहीत. शेजारी, नातेवाइकांकडेही चौकशी केली असता ती सापडली नाहीत.

दरम्यान, काही वेळाने ग्रामस्थांना ओढ्याजवळील सिद्धू करे यांच्या विहिरीच्या काठावर घागर, चप्पल आढळली. त्यामुळे विवाहितेने आत्महत्या केल्याचा संशय बळावला. घटनेची माहिती पोलिसपाटील श्रीशैल चौगुले यांनी उमदी पोलिस ठाण्यात दिली.

दरम्यान, विहिरीतून पाण्याचा उपसा सुरू केला; परंतु ओढ्याला पाणी असल्याने पाणी निघाले नाही. मृतदेह शोधण्यास अडथळा येत होता. अखेर सांगोला येथील रेसक्यू पथकाला पाचारण केले. रेसक्यू टीमने काल दुपारी एक वाजता मृतदेह विहिरीतून बाहेर काढले. जत येथील ग्रामीण रुग्णालयात मृतदेहांची उत्तरणीय तपासणी करून नातेवाइकांच्या ताब्यात दिले. अधिक तपास सहायक निरीक्षक संदीप कांबळे करीत आहेत.