इस्लामपूर (जिल्हा सांगली) : वाळवा, आष्टा तसेच तालुक्यातील नदीकाठच्या परिसरात चोरट्यानी धुमाकूळ घातला असल्याच्या घटनांनी वातावरण ढवळून निघाले आहे. प्रत्यक्षात चोरीच्या घडणाऱ्या घटना, दाखल होणारे गुन्हे आणि निर्माण झालेले वातावरण यात मात्र तफावत आहे. या वातावरणात घाबरून जाऊ नये आणि गैरसमजातून कोणतीही समाजविघातक कृत्ये करू नयेत, असे आवाहन पोलिसांनी नागरिकांना केले आहे.

वाळवा आणि पलूस तालुक्यातील कृष्णा नदीच्या काठावरील गावांमध्ये सध्या घबराटीचे वातावरण निर्माण झाले आहे. काही चोर टोळीने फिरत असून नागरिकांवर हल्ले करत आहेत आणि सोने व रोख रक्कम लुटून नेत असल्याच्या चर्चा आहेत. नदीकाठावरील गावांमध्ये रात्री गस्ती घातल्या जात आहेत. चोर कमी आणि त्यांना शोधणारेच जास्त असे चित्र निर्माण झाले आहे. रात्री उशिरापर्यंत काही तरुण हातात बॅटरी घेऊन परिसरात, शेतात, माळावर फिरत आहेत, त्यामुळे वातावरण आणखी गढूळ बनत आहे. चोरांच्या शोधासाठी फिरणाऱ्या लोकांनाच चोर आले आहेत की काय असे समजून त्यांचाही पाठलाग केल्याच्या घटना घडल्या आहेत तर आष्टा परिसरात एका मनोरुग्ण व्यक्तीला तसेच एका बॅग विक्री करणाऱ्या व्यक्तीला चोर समजून जमावाने मारहाण केल्याची घटना घडली आहे. वाळवा येथे एका टेम्पोवरही दगडफेक झाली आहे.

दरम्यान या तथाकथित चोरांनी 'ड्रोन'सारख्या आधुनिक तंत्रज्ञानाचा वापर करून चोरीचा फंडा अवलंबला असल्याच्या प्रकारानेही जोर धरला आहे. प्रत्यक्षात हे ड्रोन जवळून कुणी पाहिल्याचे निदर्शनास आणून दिलेले नाही. शिवाय हे ड्रोन पोलिसांचे असल्याचा आणखी एक गैरसमज सोशल मीडियावर व्हायरल झाला आहे. पोलिसांनी हे स्पष्टपणे नाकारले असून नागरिकांनी कोणत्याही अफवांनी घाबरू नये किंवा बळी पडू नये, असे आवाहन केले आहे.

सोशल मीडिया जपून वापरा

कोणतीही शहानिशा, खात्री न करता काही लोक सोशल मीडियावर वाटेल ती माहिती पसरवत आहेत. त्याचा वाईट परिणाम होऊ शकतो याचे भान बाळगण्याची गरज आहे. असे काही प्रकार उघडकीस आल्यास कारवाई करण्याचा इशारा पोलिसांनी दिला आहे.

"सहज बोलताना ड्रोन पोलिसांचा असू शकतो किंवा काहीवेळा सरकारी ड्रोन असू शकतात, असे मत व्यक्त केले होते. परंतु सध्या ज्या ड्रोनची अफवा पसरली आहे ते ड्रोन आमचे आहेत, असा त्याचा अर्थ नाही. बंदोबस्ताच्या वेळी आम्ही ड्रोन वापरत असतो. आमच्याकडे फक्त एक ड्रोन आहे. आसपास जे व्यावसायिक ड्रोन असतात, त्यांना परवानगी मिळालेली असते. ग्रामविकास, जिल्हा प्रशासन यांचेही ड्रोन असतात. महापुरासारख्या प्रसंगात ते वापरले जातात. ड्रोन वापरून चोरी करायला एवढे 'हायटेक' चोर असू शकत नाहीत. नागरिकांनी घाबरू नये. काही शंका आल्यास ११२ क्रमांकावर संपर्क साधावा."

-मंगेश चव्हाण,

पोलीस उपअधीक्षक, इस्लामपूर-शिराळा.