इस्लामपूर - भाजपा केंद्र सरकारचे सामान्य माणसांच्या प्रश्नाकडे दुर्लक्ष आहे. येत्या लोकसभा निवडणुकीच्या पार्श्वभूमीवर केंद्र सरकार अनेक लोकप्रिय घोषणा करून जाहिरातीवर कोटयावधी रुपये खर्च करतील. आपण विचलित न होता जागृत व सावध रहा, असे आवाहन राष्ट्रवादी काँग्रेसचे प्रदेशाध्यक्ष, माजी मंत्री, आमदार जयंत पाटील यांनी केले. राज्य सरकारला कृष्णा नदीतील पाण्याचे योग्य नियोजन करता आले नसल्याने आपणास पाणी टंचाईस सामोरे जावे लागणार असल्याचेही त्यांनी सांगितले.

साखराळे येथे 'एक तास राष्ट्रवादीसाठी, आगामी महाराष्ट्राच्या विकासासाठी' या उपक्रमाअंतर्गत आयोजित सभेत ते बोलत होते. राष्ट्रवादी काँग्रेसचे तालुकाध्यक्ष विजयराव पाटील, आनंदराव पाटील, सरपंच सुजाता डांगे, अविनाश पाटील, बाबुराव पाटील, महिला राष्ट्रवादीच्या जिल्हा उपाध्यक्षा अलका माने, रामराजे पाटील प्रमुख उपस्थित होते.

आमदार जयंत पाटील यांनी केंद्र सरकार लोकप्रिय घोषणा करून जाहिरातीवर कसे खर्च करते आणि त्यातून काहीच कसे साध्य होत नाही, याची जंत्रीच ग्रामस्थांच्या समोर ठेवली. ते म्हणाले, "मेक इन इंडिया हा केंद्र सरकारने मोठा गाजावाजा करीत सुरू केलेला उपक्रम पूर्णपणे अपयशी ठरला आहे. बेटी बचाव,बेटी पढाव या योजनेवर एकूण १३६७ कोटी खर्च झाले त्यातील ७४० योजनेवर तर तब्बल ४०० कोटी जाहिरातीवर खर्च केले. उज्ज्वला गॅस योजनेतील ९२ लाख कुटुंबांनी एकदाही गॅस सिलेंडर भरून आणले नाही तर ३ कोटी कुटुंबाने केवळ २ वेळा सिलेंडर भरून आणले आहे. व्यावसायिक सिलेंडर १०१ रुपयांनी वाढविले असल्याने चहा-भजी, वडा-पाव आदी नाष्टा करणारांना चार पैसे जादा मोजावे लागतील.

पैसे गोळा करण्याचा उद्योग!

खते, बी-बियाणे विक्रेत्या दुकानदारांना मोक्का लावण्याची भाषा म्हणजे पैसे गोळा करण्याचा उद्योग आहे. मोक्का लावायचा झाला तर तो बियाणे निर्मिती करणाऱ्या कंपन्यांना लावायला हवा, असे जयंत पाटील म्हणाले.