सांगली : कोयना, वारणा धरणांतून (Koyna, Warna Dam) पाण्याचा विसर्ग जवळपास थांबवण्यात आला आहे. फक्त विद्युत निर्मिती केंद्रातील विसर्ग सुरू आहे. त्यामुळे नदीपात्रातील पाण्याची पातळी झपाट्याने कमी होत असून कृष्णामाई (Krishna River) पात्राकडे सरकू लागली आहे. बुधवारी सायंकाळपर्यंत पूरपट्ट्यातील नागरी वस्त्यांतून पाणी हटेल, असा प्राथमिक अंदाज व्यक्त करण्यात आला आहे.

कृष्णा नदीची पाणी पातळी गेल्या ४८ तासांत संथ गतीने कमी होत अखेर ३५ फुटांपेक्षा कमी झाली आहे. गेल्या बारा दिवसांत चारवेळा पाणी पातळीने ४० फुटांची इशारा पातळी ओलांडली होती. पाऊस वाढला की पाणी वाढत होती आणि पावसाने उसंत घेतली की पुन्हा घट होत होती. दोन दिवसांत पाऊस थांबला. धरण भरून घेण्याची प्रक्रिया सुरू करताना विसर्ग कमी करण्यात आला.

परिणामी, कृष्णा नदीची पाणी पातळी सकाळपासून वेगाने कमी व्हायला लागली. सकाळी ६ वाजता आयर्विन पुलाजवळ पातळी ३८ फुटांवर होती. ती सायंकाळी ५ वाजता ३४ फूट ९ इंच झाली होती. कोयना धरणातून काल विसर्ग मोठ्या प्रमाणात कमी करण्यात आला. फक्त विद्युत निर्मितीच्या दोन दरवाजातून २१०० क्यूसेक इतका विसर्ग केला जातोय. तीन दिवसांत ५० हजार क्यूसेक इतका विसर्ग कमी करण्यात आला आहे.

स्वच्छता मोहीम सुरू

कृष्णा नदी पात्राकडे सरकू लागल्यानंतर पूरग्रस्तांनी आजपासून स्वच्छता मोहीम हाती घेतली. ज्या घरांतून पाणी मागे हटले आहे, ते लोक घराकडे जाऊन घराची साफसफाई करताना दिसले. पाणी पूर्ण पात्रात गेल्यानंतर आणि महापालिकेची संपूर्ण स्वच्छता मोहीम झाल्यानंतरच लोकांनी घरी परतावे, असे आवाहन करण्यात आले आहे.