तासगाव (सांगली): तासगाव (tasgaon)तालुक्यातील बस्तवडे येथे शिवाजी विद्यापीठाच्या (shivaji university)उपकेंद्रास तत्वतः मान्यता दिल्याची घोषणा उच्च व तंत्र शिक्षणमंत्री उदय सामंत (uday samant)यांनी व्हिडीओ कॉन्फरन्स द्वारे झालेल्या चर्चेनंतर केली. दोन दिवसात शिवाजी विद्यापीठाची समिती उपकेंद्र उभे करण्याच्या जागेला भेट देणार आहे.आटपाडी खानापूर जत कवठेमहांकाळ तालुक्यातील विद्यार्थ्यांना या निर्णयाचा फायदा होणार आहे.(shivaji-university-sub-center-in-tasgaon-sangli-education-marathi-news)

आज या विषयासाठी व्हिडीओ कॉन्फरन्स बोलविण्यात आली होती. यामध्ये उच्च शिक्षण मंत्री उदय सामंत , शिवाजी विद्यापीठाचे कुलगुरू डॉ. डी. टी. शिर्के, आमदार सुमनताई पाटील, राष्ट्रवादी चे नेते रोहित पाटील, उपकेंद्र समितीचे अध्यक्ष धैर्यशील पाटील, यांच्यासह वरिष्ठ अधिकारी सहभागी झाले होते. आमदार पाटील तासगाव येथील शासकीय विश्रामगृहातून यामध्ये सहभागी झाल्या होत्या.

आर आर आबांनी गडचिरोली जिल्ह्यात विद्यापीठाच्या सुविधा उभ्या केल्या, त्या आर आर आबांच्या तालुक्यात शिवाजी विद्यापीठ उपकेंद्रास मान्यता देताना मला विशेष आनंद होत आहे. अशा भावना यावेळी उच्च शिक्षण मंत्री सामंत यांनी व्यक्त केल्या. याबाबत तातडीने कार्यवाही सुरु करण्याच्या सूचना मंत्री सामंत यांनी दिल्या. रोहित पाटील यांनी यावेळी तासगाव तालुक्यात शिवाजी विद्यापीठ उपकेंद्र का आवश्यक आहे.याबद्दल भूमिका मांडून यासाठी केलेल्या पाठपुराव्याची माहिती दिली.

हेही वाचा- भारतीय गोवंश गीर गाईंमुळे ब्राझीलची 'अशी' उभी राहिली अर्थव्यवस्था!

या उपकेंदरासाठी बस्तवडे ता तासगाव येथील गायरान असलेली ११० एकर जागा निश्चित करण्यात आली असून याठिकाणी येत्या दोन चार दिवसात शिवाजी विद्यापीठाचे पथक भेट देणार आहे. बस्तवडे येथे शिवाजी विद्यापीठ उपकेंद्र व्हावे यासाठी दीड दोन वर्षांपूर्वी आमदार सुमनताई पाटील शासनाकडे प्रस्ताव दिला होता. राष्ट्रवादी काँग्रेस विद्यार्थी सेलचे स्वप्नील पाटील यांनी उपकेंद्र तासगाव तालुक्यात व्हावे यासाठी सुरुवातीपासून पाठपुरावा केला आहे.