सांगली : केंद्रीय मंत्री नारायण राणे (narayan rane) यांनी मुख्यमंत्री उध्दव ठाकरे (uddhav thackeray) यांच्याविरोधात केलेल्या वादग्रस्त वक्तव्याचे तीव्र पडसाद आज येथे उमटले. शिवसेनेच्या कार्यकर्त्यांनी येथील आमदार सुधीर गाडगीळ यांच्या विश्रामबाग येथील कार्यालयासमोर लावलेल्या शुभेच्छा फलकावरील राणे यांच्या प्रतिमेला काळे फासले. त्यानंतर शहरात पोलिसांनी तत्काळ धाव घेत तो फलक (sangli update) उतरवला. याप्रकरणी पोलिसांनी शिवसेनेचे विभागप्रमुख अमोल कांबळे यांना ताब्यात घेतले आहे.

केंद्रीय मंत्री राणे यांनी जनआशिर्वाद यात्रेदरम्यान महाड येथे पत्रकार परिषदेत बोलताना मुख्यमंत्री ठाकरे यांच्याविषयी बोलताना त्यांच्या कानशिलात लावले असते असे वादग्रस्त वक्तव्य केले. त्याचे पडसाद राज्यभरात उमटल्यानंतर सांगलीतही आज सकाळी शिवसेनेने (shivsena) शहरात निदर्शने केली. कुपवाड येथे कार्यकर्त्यांनी निदर्शने केली. राणे यांच्या निषेधार्थ घोषणा दिल्या.

दरम्यान आज सकाळीच सामसूम असताना शिवसेना कार्यकर्ते कांबळे यांनी धाव घेत फलकाला काळे फासले. समाज माध्यमांवरून त्याचा व्हिडीओ व्हायरल झाला. त्यानंतर पोलिसांनी तत्काळ पोलिस कार्यालयाच्या आवारात धावले. तेथे पोलिस छावणीचे स्वरुप आले. भाजपचे कार्यकर्तेही धावले. पोलिसांनी समजून काढत फलक खाली उतरवला. दुपारनंतर शहरात ठिकठिकाणी पोलिस बंदोबस्त वाढवला. कुपवाड,मिरज, सांगलीत शिवसेनेचे कार्यकर्ते जमा होत आहेत. त्यामुळे शहरातील वातावरणात तणाव वाढला.