पंढरपूर : लाखो भाविकांचे श्रद्धास्थान असलेल्या विठुरायाचे आता केवळ दोन तासांमध्ये पदस्पर्श दर्शन घेता येणार आहे. यासाठी राज्य सरकारने टोकन दर्शन (Tirupati Balaji) व्यवस्थेला मान्यता दिली आहे.

गोपाळपूर रोडवरील पत्रास शेड या ठिकाणी दर्शन मंडप उभारून टोकन व्यवस्था केली जाणार आहे. यासाठी मुख्यमंत्री एकनाथ शिंदे (Eknath Shinde) यांनी आज 103 कोटी रुपयांच्या विकास आराखड्याची घोषणा केली.

सध्या विठ्ठल दर्शनासाठी 17 ते 18 तास लागतात. टोकन दर्शनाची व्यवस्था सुरू झाल्यानंतर भाविकांना केवळ दोन तासांमध्ये लाडक्या विठुरायाचे पदस्पर्श दर्शन मिळणार आहे. तिरुपती बालाजीच्या धर्तीवर टोकन दर्शन व्यवस्था सुरू होणार असल्याने भाविकांना मोठा दिलासा मिळणार आहे, अशी माहिती मंदिर समितीचे सहअध्यक्ष गहिनीनाथ महाराज औसेकर (Gahininath Maharaj Ausekar) यांनी आज 'सकाळ'शी बोलताना दिली.