सोलापूर : सोलापूर शहर राष्ट्रवादीच्या अध्यक्षपदी भारत जाधव (Bharat Jadhav) हेच कायम राहणार असल्याचे या पक्षाचे हायकमांड तथा सर्वेसर्वा शरद पवार यांनी मुंबईत सांगितले. दरम्यान, दस्तुरखुद्द पवार यांच्या या स्पष्टीकरणामुळे भारत जाधव यांच्याकडेच अध्यक्षपदाचे सिंहासन कायम राहतानाच, शहराध्यक्ष बदलाच्या चर्चेला पूर्णविराम मिळणार आहे.

दरम्यान, प्रदेश आणि राष्ट्रीय पातळीवरील राष्ट्रवादीसंदर्भात शरद पवारांनी (Sharad Pawar) नुकतीच भाकरी फिरविली. मात्र, सोलापूरच्या राष्ट्रवादीच्या भाकरी फिरविण्याला त्यांनी विरोध दर्शवला आहे. सोलापूर शहर राष्ट्रवादी काँग्रेसचे सेक्रेटरी बाळासाहेब मोरे यांनी मुंबईत सिल्व्हर ओक निवासस्थानी शरद पवार यांची भेट घेतली.

यादरम्यान संवाद साधताना मोरे यांनी सोलापूर शहर अध्यक्षपदाच्या (Solapur City NCP President) बदलाचा विषय पवार यांच्या समोर उपस्थित केला. त्यावर पवार म्हणाले की, सध्या तरी बदलाचा कोणताच विषय नाही. याप्रसंगी, मोरे यांनी शहराध्यक्ष बदलासंबंधी प्रसारमाध्यमांकडे आलेल्या बातम्या पवार यांना दाखविल्या.

त्यावर पवार यांनी सांगितले की, प्रसारमाध्यमांकडे बातम्या आल्या म्हणजे शहराध्यक्ष बदलत नसतो अशी पुस्तीही त्यांनी यावेळी जोडली. पक्षाचा राष्ट्रीय अध्यक्ष म्हणून मी सांगतो आहे की, सोलापूर शहराचा अध्यक्ष सध्या तरी बदलला जाणार नाही. बदलाविषयी होत असलेल्या चर्चांमध्ये तथ्य नाही असे शेवटी पवार यावेळी म्हणाले.