सोलापूर : शहरातील शिवसेना (Shiv Sena), एमआयएम (MIM), वंचित बहुजन आघाडीतील (Wanchit Bahujan Aghadi) दिग्गज राष्ट्रवादी कॉंग्रेसच्या (NCP) वाटेवर आहेत. कॉंग्रेसचे (Cngress) माजी महापौर नलिनी चंदेले (Nalini Chandele), माजी शहराध्यक्ष सुधीर खरटमल (Sudhir Kharatmal) यांनी 8 ऑक्‍टोबर रोजी राष्ट्रवादीचे सर्वेसर्वा शरद पवार (Sharad Pawar) यांच्या उपस्थितीत कॉंग्रेसला सोडचिठ्ठी दिली. त्यावेळी कॉंग्रेसचे माजी महापौर ऍड. यू. एन. बेरियांनीही (U. N. Beria) महेश कोठेंच्या (Mahesh Kothe) निवासस्थानी जाऊन पवारांची भेट घेतली होती. त्यानंतर कॉंग्रेस नेत्यांनी त्यांची समजूत काढली. तरीही, तीन दिवसांपूर्वी ते राष्ट्रवादी नेत्यांच्या बैठकीला आवर्जून हजर राहिले. त्यामुळे 'ऍड. बेरियाजी, हा योगायोग की खरटमल, चंदेलेंप्रमाणे तुम्ही पण कॉंग्रेस सोडली', असा प्रश्‍न उपस्थित होऊ लागला आहे.

कॉंग्रेस-राष्ट्रवादीचा बालेकिल्ला असलेल्या सोलापूर महापालिकेवर मोदी लाटेत भाजपने सत्ता काबीज केली. राज्यात महाविकास आघाडीचे सरकार स्थापन झाल्यापासून राष्ट्रवादीचा भाव वधारला आहे. शिवसेनेचा धनुष्यबाण खाली ठेवत महेश कोठेंनी राष्ट्रवादी कॉंग्रेसची वाट धरली. पालकमंत्री दत्तात्रय भरणेंच्या माध्यमातून आनंद चंदनशिवे, तौफिक शेख हेदेखील राष्ट्रवादीचे ज्येष्ठ नेते शरद पवार, उपमुख्यमंत्री अजित पवार यांच्या प्रेमात पडले. पक्षात मानपान मिळत नाही, माजी केंद्रीय मंत्री सुशीलकुमार शिंदे यांचा खासदारकीला दोनदा पराभव झाल्यानंतर तेही राजकारणातून अलिप्त आहेत. दुसरीकडे आमदार प्रणिती शिंदे याही आठवड्यातील काही दिवस सोलापूर दौऱ्यावर येतात आणि लगेचच मुंबईला जातात. पक्षाचे संघटन विस्कटल्याने महापालिका निवडणुकीत सत्ता मिळणे कठीण असल्याचे बोलले जात आहे. दुसरीकडे, निवडणुकीपूर्वी कोठेंसोबत त्यांचे समर्थक नगरसेवकही राष्ट्रवादीत येतील, असा अंदाज आहे. त्यामुळे आगामी निवडणुकीत राष्ट्रवादीच मोठा पक्ष राहील, याची खात्री वाटू लागल्याने बेरियांनी पक्षांतराचा निर्णय घेतल्याची चर्चा आहे.

ऍड. बेरियांची एकच मागणी...

ऍड. यू. एन. बेरिया हे खूप वर्षांपासून अस्वस्थ असतानाही त्यांनी "पक्ष सोडणार नाही, अजून कोणताही निर्णय घेतला नाही', असे सांगून वेळ मारून नेली. मात्र, आता निर्णय घेण्याची हीच योग्य असल्याचे पटवून देण्यात महेश कोठेंसह राष्ट्रवादीतील वरिष्ठ नेतेमंडळी यशस्वी ठरली आहेत. त्यामुळेच त्या नेत्यांशी बेरियांची जवळीकता वाढली आहे. तत्पूर्वी, मागील विधानसभा निवडणुकीवेळी त्यांनी बंडाचे निशाण फडकावत आमदार प्रणिती शिंदे यांना सोलापूर लोकसभेची उमेवारी देऊन शहर मध्य विधानसभा मतदारसंघातून मुस्लिम उमेदवार द्यावा, अशी मागणी केली होती. मात्र, ती मागणी पूर्ण न झाल्याने बेरिया अस्वस्थ असल्याचे बोलले जात आहे.

आचारसंहितेपूर्वी सर्वांचेच पक्षांतर

एखाद्या पक्षाच्या चिन्हावरील पदाचा लाभ घेत असताना कायदेशीररीत्या पक्षांतर करता येत नाही. तरीही, पक्षांतर केल्यास पक्षांतर बंदी कायद्याअंर्गत कारवाई होऊ शकते. या तांत्रिक अडचणींमुळे इच्छुकांचे प्रवेश रखडले आहेत. महापालिका निवडणुकीची आचारसंहिता जाहीर झाल्यानंतर लगेचच राष्ट्रवादीतील दिग्गजांच्या उपस्थितीत सर्वांच्या पक्षप्रवेशाचा जंगी कार्यक्रम होईल, अशी माहिती सूत्रांनी दिली.