पोलिस प्रशासनाच्या पत्रानुसार महापालिकेच्या आरोग्य विभागाने नाकाबंदीच्या ठिकाणी 511 जणांची कोरोना चाचणी केली.

सोलापूर : मराठा आक्रोश मोर्चावेळी (Maratha Akrosh Morcha) गर्दी होईल आणि कोरोना (Covid-19) पॉझिटिव्ह एखादा तरुण अनेकांना बाधित करू शकतो, या पार्श्‍वभूमीवर पोलिस प्रशासनाच्या पत्रानुसार महापालिकेच्या आरोग्य विभागाने नाकाबंदीच्या ठिकाणी 511 जणांची कोरोना चाचणी (Covid test) केली. शनिवार, रविवारी (ता. 4) या दोन दिवसांत सात चेक पोस्टवर 511 संशयितांची कोरोना चाचणी पार पडली. त्यात एकही व्यक्‍ती कोरोना पॉझिटिव्ह आढळली नाही, अशी माहिती महापालिकेच्या आरोग्याधिकारी डॉ. अरुंधती हराळकर (Municipal Health Officer Dr. Arundhati Haralkar) यांनी दिली. (Corona test of those who came to Maratha Akrosh Morcha is negative)

सोलापुरातील कोरोनाचा प्रादुर्भाव आटोक्‍यात आला असून, ग्रामीण भागातील संसर्गही कमी होत असल्याचे चित्र आहे. मराठा आरक्षणाच्या मागणीसाठी जिल्हाभरातून मराठा बांधव सोलापुरात येणार होते. त्यातील एखाद्या कोरोना पॉझिटिव्ह तरुणामुळे अनेकांना कोरोनाची बाधा होऊ शकते, अशी भीती पोलिसांना होती. त्यामुळे ग्रामीण व शहर पोलिस प्रशासनाने शहरालगतच्या नाकाबंदी पॉईंटवर संशयितांची (रॅंडमली) कोरोना चाचणी करावी, अशी मागणी केली. त्यानुसार महापालिकेने सात नाकाबंदी पॉईंटवर 11 स्वॅबरची नेमणूक केली. त्यांनी 3 जुलैला (शनिवारी) 205 जणांची तर मोर्चाच्या दिवशी (रविवारी) 306 संशयितांची कोरोना चाचणी केली. त्यापैकी एकाही व्यक्‍तीचा रॅपिड अँटिजेन टेस्टचा रिपोर्ट पॉझिटिव्ह आला नाही, हे विशेष. सहाय्यक वैद्यकीय अधिकारी डॉ. अतिष बोराडे यांच्या मार्गदर्शनाखाली आरोग्य विभागातील डॉक्‍टरांनी काम पाहिले.

संकल्पना उत्तम, पण नियोजनाचा अभाव

महापालिकेच्या आरोग्य विभागाने पोलिस प्रशासनाच्या पत्रानुसार सात चेक पोस्टवर कोरोना चाचणीची मोहीम राबविण्याचे नियोजन केले. मात्र, नवीन विजापूर नाका येथे रविवारी एकाही संशयिताची चाचणी करण्यात आली नाही. तर होटगी नाका चेक पोस्टवर दोन दिवसांत एकाही संशयिताची कोरोना चाचणी झाली नाही. नवीन अक्‍कलकोट नाका व दळवे-पाटील शोरूमजवळील चेक पोस्टवर 351 जणांची तर उर्वरित पाच ठिकाणी केवळ 160 संशयितांची कोरोना चाचणी पार पडली. विशेष म्हणजे जे आंदोलक स्वत:हून चाचणी करायला पुढे आले, त्यांचीच कोरोना चाचणी त्या ठिकाणी करण्यात आली.