पंढरपूर : राज्यात राजकीय उलथापालथींना वेग आला आहे. अजित पवार गटाचे अनेक नेते आणि आमदार शरद पवार (Sharad Pawar) गटाकडे जात असतानाच, आज माढ्यात अजित पवार यांना मोठा धक्का बसला आहे. अजित पवार (Ajit Pawar) यांचे कट्टर समर्थक आमदार बबनराव शिंदे (Baban Shinde) यांनी अजित पवार आणि महायुतीची साथ सोडण्याचा निर्णय घेतला आहे.

जिल्हा दूध संघाचे अध्यक्ष रणजितसिंह शिंदे (Ranjit Singh Shinde) यांना अपक्ष निवडणुकीच्या मैदानात उतरवण्याचा आमदार शिंदे यांनी निर्णय घेतला आहे. आमदार बबनराव शिंदे आज पंढरपुरात आले होते. यावेळी माध्यमांशी बोलताना आपली राजकीय भूमिका स्पष्ट केली. आमदार शिंदे यांनी घेतलेल्या राजकीय भूमिकेमुळे अजित पवारांना मोठा धक्का बसला आहे.

माढ्याचे आमदार बबन शिंदे यांनी शरद पवारांची साथ सोडून अजित पवारांना साथ दिली होती. दरम्यान, आमदार शिंदे यांना राजकीय परिस्थितीचा अंदाज आल्यानंतर त्यांनी दोन वेळा शरद पवारांची भेट घेऊन उमेदवाराची मागणी केली होती. परंतु, माढ्यातील राष्ट्रवादीच्या पदाधिकाऱ्यांनी आमदार शिंदे यांना उमेदवारी देण्यास विरोध केला. वाढता विरोध पाहता आमदार शिंदे यांनी मुलाला अपक्ष निवडणुकीच्या मैदानात उतरवण्याचा निर्णय घेतला आहे.

आमदार बबन शिंदे म्हणाले, शरद पवार यांची दोन वेळा भेट घेऊन उमेदवारीची मागणी केली आहे. त्यांनी अद्याप कोणालाच उमेदवारीचा शब्द दिला नाही. शरद पवारांनी उमेदवारी दिली नाही तर माझा मुलगा रणजितसिंह हा माढ्यातून अपक्ष निवडणूक लढवणार आहे. यातून आमदार शिंदे यांनी शरद पवारांना ही सूचक इशारा दिल्याची चर्चा सुरू झाली आहे. दरम्यान, आमदार बबनराव शिंदे यांच्या भूमिकेनंतर माढ्याचा महायुतीचा उमेदवार कोण याची चर्चा सुरू झाली आहे.