सोलापूर : भाजप-शिवसेना युती सरकारमध्ये जलसंधारण मंत्री राहिलेल्या आमदार तानाजी सावंत यांना महाविकास आघाडीत संधी मिळाली नाही. त्यावेळी ते पक्षप्रमुख उद्धव ठाकरे यांच्यावर नाराज होते. पण, आता शिंदे-फडणवीस सरकारच्या मंत्रिमंडळ विस्तारात त्यांना लॉटरी लागली. स्वातंत्र्यदिनाच्या निमित्ताने ते धाराशिव दौऱ्यावर येत आहेत.

मंत्री तानाजी सावंत दौऱ्यावर पण...
शिंदे-फडणवीस सरकारमधील नुतन मंत्री तानाजी सावंत हे मंत्रिपदाची शपथ घेतल्यानंतर प्रथमच सोलापूर दौऱ्यावर येत आहेत. पण, बार्शी येथील बीआयटी कॉलेज येथून ते मोटारीतून थेट परांड्याला जाणार आहेत. भूम-वाशीतून ते धाराशिवमधील शासकीय विश्रामगृह येथे जातील, असा त्यांचा १३, १४ ऑगस्टचा दौरा आहे. स्वातंत्र्यदिनी ते धाराशिवमध्ये ध्वजावंदन करतील.

• असा आहे दौरा…
  - शनिवारी (ता. १३) सायंकाळी पाच वाजता पुण्याहून मोटारीचे बार्शीकडे प्रयाण
  - शनिवारी रात्री साडेदहा वाजता बार्शीतील बीआयटी कॉलेज, बार्शी येथे आगमन व मुक्काम
  - रविवारी (ता. १४) सकाळी साडेआठ वाजता ते मोटारीने परांड्याला निघतील
  - सकाळी साडेनऊ वाजता परांडा (जि. धाराशिव) येथे पोहचतील
  - त्याच दिवशी सकाळी साडेअकरा वाजता ते भूमकडे निघणार आहेत
  - दुपारी १२ ते तीन वाजेपर्यंत भूम येथे आणि त्यानंतर सायंकाळी चार वाजता वाशीला येतील
  - रविवारी सायंकाळी सात वाजता वाशीतून धाराशिवमधील शासकीय विश्रामगृहाकडे निघतील