सोलापूर : पैशाच्या व्यवहारातून चारचाकी गाडीतून आलेल्या नऊजणांसह साथीदारांनी काठ्या, सळई व कोयत्याने केलेल्या हल्ल्यात १९ वर्षीय तरुणाचा मृत्यू झाला. शुक्रवारी (ता. ४) सायंकाळच्या सुमारास जुळे ही घटना घडली. अथर्व दिनेश जाधव (रा. सरस्वती बिल्डिंग, अमृत नगर, विजापूर रोड, सोलापूर) असे खून झालेल्याचे नाव आहे. याप्रकरणी त्या नऊजणांसह साथीदारांविरुद्ध विजापूर नाका पोलिस ठाण्यात खुनाचा गुन्हा दाखल केला आहे.

प्रसाद लोंढे, बाळू काळे, सागर कदम, केदार गुमटे, मनोज सूर्यराव ऊर्फ भाईजी, अजिंक्य शाबादे, प्रकाश शिंदे ऊर्फ बुद्धा, जॉकी थोरात, विनायक जाधव व त्यांच्या साथीदारांचा गुन्हा दाखल झालेल्यांत समावेश आहे. याप्रकरणी मृत अथर्व याचे वडील दिनेश प्रकाश जाधव यांनी फिर्याद दिली आहे.

पैशाच्या व्यवहारातून सायंकाळी सव्वासहापूर्वी संशयित हे वेगवेगळ्या तीन चारचाकी वाहनांतून जुळे सोलापुरातील इंडियन मॉडेल स्कूलच्या मागील रेणुका नगरातील मोकळ्या मैदानातील शेडमध्ये आले.

त्यांनी सोबत आणलेल्या काठ्या, सळई व कोयत्याने अथर्व याच्यावर हल्ला केला. तसेच त्यांनी त्याच्यासोबतच्या प्रदीप मंगळवेढेकर, शिवकुमार तंबाखे, राहुल साठे, समर्थ माटे यांनाही मारहाण केली. त्यांच्या मारहाणीत अथर्व हा गंभीर जखमी झाला.

जखमी अथर्व याला उपचारासाठी शासकीय रुग्णालयात दाखल केले. उपचार सुरू असताना शुक्रवारी मध्यरात्रीनंतर दीडच्या सुमारास त्याचा मृत्यू झाला. याप्रकरणी सहायक पोलिस निरीक्षक शीतलकुमार गायकवाड तपास करीत आहेत.

घटनेनंतर पोलिस उपायुक्त विजय कबाडे, दीपाली काळे, सहायक पोलिस आयुक्त यशवंत गवारी, राजन माने यांनी घटनास्थळी भेट दिली. तसेच पोलिस अधिकाऱ्यांना तपासविषयक सूचना दिल्या. याप्रसंगी वरिष्ठ पोलिस अधिकारी दादा गायकवाड, गुन्हे शाखेचे पोलिस निरीक्षक सुनील दोरगे, सहाय्यक पोलिस निरीक्षक शीतलकुमार गायकवाड, श्रीमती बोधे, अजय पोपळभट आदी उपस्थित होते.