सोलापूर : शहरातील मटका चालविणाऱ्यांसह खेळणाऱ्यांवर गुन्हे दाखल केले जात आहेत. कागदावरील चिठ्ठ्या, पेन व काह रक्कम असा मुद्देमाल शहर पोलिसांकडून कारवाईत जप्त केला जात आहे. पण, आता ही कारवाई टाळण्यासाठी कल्याणचा मटका चालकांनी ऑनलाइन पध्दत स्वीकारल्याची स्थिती आहे.

पान टपऱ्यांच्या आडोशाला मटका

शहरात हातभट्टी दारु आणि मटका, बनावट फ्रूट बिअर असे अवैध धंदे पुन्हा जोमाने सुरु होत असल्याचे पोलिसांच्या कारवाईतून दिसून येते. मटका हा प्रकार तत्कालीन पोलिस आयुक्त अंकुश शिंदे यांच्या काळात काही महिने पूर्णत: बंद झाला होता.

तत्कालीन सहायक पोलिस आयुक्त अभय डोंगरे यांनी कोंचिकोरवी नगरातील एका इमारतीवर छापा टाकून मोठा मुद्देमाल, कागदपत्रे जप्त केली होती. त्यात जवळपास ८० जणांवर गुन्हा दाखल झाला होता. आता पान टपऱ्यांच्या आडोशाला मटका, जुगार सुरु असल्याचे चित्र आहे. त्यातील मूख्य सूत्रधाराला पकडल्यास निश्चितपणे हा प्रकार बंद होऊ शकतो, असा विश्वास सर्वसामान्यांना वाटत आहे.