सोलापूर : जिल्ह्यात (Solapur) अनेक दिवसांच्या प्रतीक्षेनंतर समाधानकारक पावसाचे सोमवारी (ता. १७) मध्यरात्री पासून संततधार पावसाने हजेरी लावली. शहर व परिसरात मंगळवारी (ता. १८) मध्यरात्रीपर्यंत म्हणजे सलग २२ तासांहून अधिक काळ पावसाची रिमझिम सुरू होती.

दिवसभर सुरू असलेल्या पावसामुळे (Rain Update) मंगळवारी सूर्यदर्शनच झाले नाही. सुमारे १६.२ आहे. मिलिमीटर इतक्या पावसाची नोंद झाली आहे. मागील अनेक दिवसांपासून शेतकरी पावसाच्या प्रतीक्षेत आहेत. पावसाळा सुरू झाल्यापासून एकही सर्वदूर व समाधानकारक पाऊस झाला नव्हता.

सोमवारी मध्यरात्री सुरू झालेली पावसाची रिपरिप मंगळवारी रात्री उशिरापर्यंत सुरू होती. मंगळवारी दिवसभर भिजपाऊस सुरू होता. ढगाळ वातावरणामुळे दिवसभर सूर्यदर्शन झाले नाही.

सोमवारी सकाळी ८.३० ते मंगळवारी सकाळी ८.३० या वेळेत ६.७ मिलिमीटर तर मंगळवारी सकाळी ८.३० ते सायंकाळी ५.३० या वेळेत ९.५ मिलिमीटर पावसाची नोंद झाली. या पावसामुळे खरिपाच्या पिकांना जीवदान मिळणार असून, सोयाबीन व तूर पिकांची पेरणी करणे शक्य होणार आहे.

शहरातील रस्ते चिखलमय

सोलापूर शहरात ठिकठिकाणी रस्त्यांचे खोदकाम करण्यात आले आहे. या सलग पावसामुळे रस्ते चिखलमय झाले आहेत. काल दिवसभर पावसामुळे शहरातील रस्त्यांवरून फिरणेही मुश्कील झाले होते.