Barshi News - संभाजी भिडे यांनी देशाचे स्वातंत्र्य, संविधान, राष्ट्रध्वज, राष्ट्रगीतावर आक्षेपार्ह वक्तव्य केले आहे. त्यांच्यावर देशद्रोहाचा गुन्हा दाखल करून त्यांना अटक करावी,

अशी मागणी पुरोगामी पक्ष, संस्था, संघटना व भारतीय कम्युनिस्ट पक्ष यांनी संयुक्तपणे केली आहे. यावेळी यशवंतराव चव्हाण सभागृहासमोर बुधवारी (ता. २) निदर्शने आंदोलन करण्यात आले.

संभाजी भिडे यांच्याकडून महिलांबद्दल अत्यंत निंदनीय वक्तव्ये, समाजामध्ये जातीय व सामाजिक तेढ निर्माण करण्याचा प्रयत्न, महात्मा फुले, महात्मा गांधी, पंडित नेहरू आदी महापुरुषांची बदनामी करण्याचा प्रयत्न त्यांनी केला आहे.

सामान्य बहुजनांच्या कुटुंबातील मुलांमध्ये धार्मिक द्वेष पसरवण्याचे काम सातत्याने सुरू आहे. त्यांच्यावर त्वरित कारवाई करावी, अशी मागणी करण्यात आली.

यावेळी भिडेंच्या विरोधात घोषणाबाजी करून निदर्शकांनी परिसर दणाणून सोडला. यावेळी भारतीय कम्युनिस्ट पक्षाचे प्रवीण मस्तुद, अनिरुद्ध नखाते, भारत भोसले, किसान सभेचे लक्ष्मण घाडगे, किसन मुळे, लहू आगलावे, धनाजी पवार,

अंनिसचे प्रा. डॉ. ए. बी. कदम, प्रा. हेमंत शिंदे, दलित अधिकार आंदोलनाचे भीम मस्के, काँग्रेसचे सतीश पाचकुडवे, वसीम पठाण, संभाजी ब्रिगेडचे आनंद काशीद, पुरोगामी विचार मंचचे रमेश गवळी, नागनाथ सोनवणे, दलित महासंघाचे संदिपान आलाट, प्रा. डॉ. नवनाथ दनाने, अजित कांबळे, वंचितचे शोएब सय्यद आदी उपस्थित होते.