सोलापूरः लेकरू माझं लई गुणाचं हाय. दोन वरसाची व्हती तवा बाप मेला. माज्याकडनं बी कवाच तिला सुख मिळालं न्हाई. पर कसलीच कुरबूर नाय ना कट्‌टाळा नाय. साळत सगळ्यात पहिला नंबरच मिळविला लेकीनं. अन्‌ आजबी दहावीत माज्या गुणाच्या लेकीनं श्‍यान्नव टक्के गुण पाडलं. मला लय आनंद झाला बगा. तिनं माज्याबी अन्‌ तिच्याबी कष्टाचं चीज केलं बगा.....ही भावना आहे सोलापूरच्या जुना पुना नाका परिसरातील झोपडपट्टीत राहून दहावीत 96 टक्के गुण मिळवलेल्या सोनालीच्या आईची. 

हेही वाचाः सोलापूर जिल्ह्यातील मुलींचा राज्यात झेंडा! या दोन मुलींनी मिळवले 100 टक्के गुण 

जुना पुना नाका परिसरातील पावन गणपती मंदीराजवळील झोपडपट्टीत आमचं घर. मी दोन वर्षाची असताना वडील वारले. आईने आम्हा तीन कच्याबच्यासह संसाराचा गाडा ओढला. थोरल्या बहिणीचे आठवीपर्यंतच शिक्षण झालं अन्‌ वयात आली की तिचं लग्न लावलं. लग्नाच्या खर्चामुळे ओढाताण वाढली. त्यामुळे धुणीभांडी करण्यासाठी आईची अधिक धावपळ सुरू झाली. खर्च भागेना म्हणून लहान भावाला मामाकडं वैरागला ठेवलं. ही सगळी तारेवरची कसरत बघितल्यावर ठरवलं शिक्षणाशिवाय पर्याय नाही. खुप शिकायचं अन्‌ डॉक्‍टर व्हायचं. त्याच टप्प्यातला पहिला टप्पा आज सर केला. आज दहावीचा निकाल लागला अन मला 96 टक्के गुण मिळाले. दररोज कामावरून आलेल्या थकलेल्या माझ्या आईच्या चेहऱ्याकडे बघितलं की मी रोज जोमानं अभ्यास केला अन हे यश मिळालं. असं सोनाली अशोक पवार "सकाळ' शी बोलताना सांगत होती. 

हेही वाचाः ज्ञानेश्‍वरी पाटील शंभर टक्‍क्‍यासह मंगळवेढा तालुक्‍यात प्रथम 

सोनाली पवार येथील शरदचंद्र पवार प्रशालेत शिकते. पहिलीपासूनच तिने आपल्यातील नैपुण्यामुळे शाळेतील शिक्षकांचे लक्ष वेधून घेतले. दरवर्षी तिच्या अभ्यासात व कलागुणात प्रगती होत गेली. मैदानी खेळ, कराटे, वक्तृत्व अशा विविध स्पर्धातून तीने आपले नाव कायमच शाळेच्या फलकावर झळकावले. कराटे स्पर्धेसाठी तिने चेन्नई, श्रीलंकेतही आपले नैपुण्य सिध्द केले. आत्मविश्‍वासासह जिद्दीने अभ्यास केल्यामुळे सोनालीने कोणत्याही शिकवणीशिवाय झोपडपट्टीत राहूनही एवढे गुण मिळवल्याचे तीने सांगितले. आता तिला डॉक्‍टर व्हायचेय. परंतू घरच्या सांपत्तिक परिस्थितीचा अडथळाच तिची मुख्य अडचण असल्याचे तिच्याबरोबरील बोलण्यातून दिसत होते. त्यामुळे समाजातील दानशूर व शिक्षणासाठी मदत करणाऱ्या समाजधुरिणांनी तिला आता मदत करण्याची गरज आहे. आज अनेकांनी तिचे कौतुक व अभिनंदन केले परंतू तिला डॉक्‍टर करण्यासाठी व सोनालीचं स्वप्न पूर्ण होण्यासाठी तिला आर्थिक मदतीची गरज आहे. त्यामधे पुढाकार घेत आज शांता सुरवसे यांनी सोनालीला दोन हजार रूपयांचे बक्षीस देऊन सत्कार केला. दानशूर व्यक्तींना सोनालीची आई देवशिला अशोक मोरे (मोबाईल नंबर 8788563701) यांच्या बॅंक अकाउंट वर आर्थिक मदत पाठवावी. त्यांचा अकाउंट नंबर पुढील प्रमाणे युनियन बॅंक- शाखा क्रॉस रोड सोलापूर . सेव्हिंग अकाउंट नंबर - 579402010003241, IFSC No.UBIN 0557943. 
 

संपादन ः प्रकाश सनपूरकर