सोलापूर : आज बांगलादेशात जे घडत आहे ते आपल्या घरापर्यंत येण्यास विलंब लागणार नाही. त्यामुळे हिंदू समाजाने सजग राहण्याची गरज आहे. त्याकरिता हिंदूहिताचा विचार करणाऱ्यांच्या पाठीशी एकजुटीने उभे राहण्याची गरज आहे, असे प्रतिपादन प. पू. स्वामी गोविंद देव गिरी महाराज (Swami Govind Dev Giri Maharaj) यांनी केले. सोमवारी विश्व हिंदू परिषदेच्या (Vishwa Hindu Parishad) षष्ठ्यब्दी पूर्तीनिमित्त येथे आयोजित धर्माचार्य चिंतन संमेलनात ते बोलत होते.

सध्या विरोधकांनी हिंदू धर्माबद्दल (Hindu Religion) अपप्रचार सुरू केला आहे. त्यास आळा घालण्यासाठी धर्माचार्य चिंतन संमेलन होत असल्याची माहिती विहिंपचे क्षेत्रीय धार्मिक पुंज प्रमुख संजय मुद्राळे यांनी दिली. आगामी निवडणुकीत हिंदूंनी १०० टक्के मतदान करावे, असे आवाहन विहिंपचे प्रांत मंत्री किशोर चव्हाण यांनी केले. सर्व धर्माचार्यांनी धर्मप्रसारासाठी जास्तीत जास्त वेळ द्यावा, असे आवाहन अखिल भाविक वारकरी मंडळाचे राष्ट्रीय अध्यक्ष सुधाकर इंगळे महाराज यांनी केले.

श्री श्रीकंठ शिवाचार्य स्वामी म्हणाले, वसुधैव कुटुंबकम हा आपला विचार आहे. तसे संस्कार प्रत्येक कुटुंबात व्हायला हवेत. शिवाजी महाराज मोरे, लक्ष्मण चव्हाण महाराज, मारुती तुणतुणे महाराज, शीख धर्मगुरू रमेश सिंह यांनीही मार्गदर्शन केले. व्यासपीठावर नीलकंठ हिरेमठ स्वामी, राचोटेश्वर स्वामी, शिवलिंगेश्वर स्वामी, विहिंपचे जिल्हाध्यक्ष अभिमन्यू डोंगरे महाराज उपस्थित होते.