लातूर: नांदेड जिल्ह्यातून महाराष्ट्रात प्रवेश करू पाहणाऱ्या भारत राष्ट्रीय समितीच्या (बीआरएस) गळाला लातूरचे भारतीय जनता पक्षाचे माजी महापौर सुरेश पवार लागले आहेत. त्यांनी हैदराबाद येथे जाऊन समितीचे अध्यक्ष व तेलंगणचे मुख्यमंत्री के. चंद्रशेखर राव यांचा सत्कार केला. या पक्षात त्यांच्या प्रवेशाच्या चर्चेला शहरात आता उधाण आले आहे.

माजी महापौर सुरेश पवार हे खरे तर काँग्रेसचे सच्चे कार्यकर्ते. काँग्रेसतर्फे ते तत्कालीन नगरपालिकेत पाच वेळा नगरसेवक झाले. गेल्या महापालिकेच्या निवडणुकीत काँग्रेस नेतृत्वाशी त्यांचे जमले नाही.

त्यामुळे त्यांनी भाजपचे नेते संभाजी पाटील निलंगेकर यांच्या नेतृत्वाखाली पक्षात प्रवेश केला. महापालिका निवडणुकीत विजयी झाल्यानंतर निलंगेकरांनी त्यांना महापौरपद दिले. अडीच वर्षे ते महापौर पदावर कार्यरत होते, पण या पदावर त्यांना छाप टाकता आली नाही.

तेथेही त्यांचे नेतृत्वाशी शेवटी जमले नाही. काही महिन्यापूर्वीच त्यांच्या मुलाने राष्ट्रवादी काँग्रेसमध्ये प्रवेश केला होता. तेव्हापासून सुरेश पवार हे देखील राष्ट्रवादीमध्ये जातील अशी चर्चा सुरु झाली होती. पण तसे झाले नाही.

दरम्यान, सुरेश पवार यांनी हैदराबादेत जाऊन राव यांचा नुकताच सत्कार केला. त्यांच्याशी चर्चाही केली. यावेळी शेतकरी नेते शंकरअण्णा धोंडगे उपस्थितीत होते. यासदर्भात पवार यांच्याशी संपर्क साधला असता, शांतिदूत परिवाराच्या वतीने तेलंगणचे मुख्यमंत्री के चंद्रशेखर राव यांना पुरस्कार देण्यासाठी हैदराबादला गेलो होतो, असे त्यांनी स्पष्ट केले.