सोलापूर : जिल्हा उपनिबंधक कार्यालयातील वरिष्ठ लिपिक हेमंत माडीवाळप्पा नाईकवाडी याला लाचलुचपत प्रतिबंधक विभागाने आज (शुक्रवारी) अटक केली. तक्रारदाराला सावकारी दाव्याच्या नकला देण्यासाठी त्याने चार हजारांची लाच मागितली होती. पुराव्यांची पडताळणी करून लाचलुचपत प्रतिबंधक विभागाने अटकेची कारवाई केली. त्याला उद्या (शनिवारी) न्यायालयात हजर केले जाणार आहे.

दरम्यान, तक्रारदाराविरूद्ध जिल्हा उपनिबंधक कार्यालयात खासगी सावकारीचा दावा सुरु होता. त्याला स्थगिती मिळावी म्हणून तक्रारदाराला मुंबई उच्च न्यायालयात अर्ज द्यायचा होता. त्यासाठी दाव्यातील रोजनाम्याच्या नकला मिळाव्यात म्हणून तक्रारदाराने जिल्हा उपनिबंधक कार्यालयाकडे २९ मार्च रोजी अर्ज केला होता. त्या नकला अजूनही मिळाल्या नसल्याने तक्रारदाराने वरिष्ठ लिपिक हेमंत नाईकवाडी याच्याकडे पाठपुरावा केला होता. त्यावेळी त्याने चार हजार रुपयांची लाच मागितली.

त्याची तक्रार लाचलुचपत प्रतिबंधक विभागाकडे करण्यात आली होती. त्याने लाच स्वीकारण्याची तयारी दर्शविल्याचे पुराव्यातून सिद्ध झाल्याने लाचलुचपत प्रतिबंधक विभागाचे उपअधीक्षक गणेश कुंभार यांच्या मार्गदर्शनाखाली पोलिस निरीक्षक चंद्रकांत कोळी, उमाकांत महाडीक, पोलिस हवालदार शिरीषकुमार सोनवणे, पोलिस नाईक श्रीराम घुगे, श्री. नरोटे, चालक सुरवसे यांच्या पथकाने ही कारवाई केली.

लाच मागितली, पण संशयामुळे स्वीकारली नाही

जिल्हा उपनिबंधक कार्यालयातील वरिष्ठ लिपिक हेमंत नाईकवाडी याने तक्रारदाराकडे चार हजारांची लाच मागितली. गुरुवारी (ता. २९) त्याला पकडण्यासाठी लाचलुचपत प्रतिबंधक विभागाने सापळा रचला, पण त्याने लाचेची रक्कम त्या दिवशी स्वीकारली नाही. त्याला तक्रारदाराबद्दल संशय आल्याने संशयित आरोपीने लाचेची रक्कम स्वीकारली नसावी, अशी शक्यता वर्तविण्यात आली आहे