करमाळा (सोलापूर) : करमाळा कृषी उत्पन्न बाजार समितीत (karmala market committee) सुरवातीला बागल गटाकडून शिवाजी बंडगर हे सभापती झाले. बाजार समितीवर असलेली तीस वर्षांची जयवंतराव जगताप यांची सत्ता घालवण्यात बागल गटाला निश्‍चित यश आले. ही सत्ता घालवण्यासाठी त्यांना नारायण पाटील गटाचे शिवाजी बंडगर यांना बागल गटात घ्यावे लागले. जगताप गटाची सत्ता जाण्यास शिवाजी बंडगर यांची बंडखोरी कारणीभूत ठरली. (the karmala market committee is once again in discussion over the election of a secretary)

सभापती निवडीच्या वेळी बाजार समितीत झालेल्या वादातून करमाळा तालुक्‍याच्या राजकारणाची दिशा बदलून गेली. यांचे परिणाम तालुक्‍यातील सर्वच प्रमुख गटांना भोगावे लागत आहेत. या घटनेला येत्या ऑक्‍टोबरमध्ये तीन वर्षे होत आहेत. तरीदेखील बाजार समितीचे तापलेले राजकारण शांत होताना दिसत नाही. गेली तीन वर्षात अनेक बैठकीला पोलिस बंदोबस्त लावावा लागला आहे. (ता. 21) रोजी झालेल्या संचालक मंडळाच्या बैठकीत सेवानिवृत्त होत असलेले सचिव सुनील शिंदे यांना मुदतवाढ देण्यावरून माजी सभापती जयवंतराव जगताप व बागल गटाचे नेते दिग्विजय बागल यांच्यात शाब्दिक खडाजंगी झाली.

सुरवातीला सचिव सुनिल शिंदे यांना मुदतवाढ देण्यास खुद्द जयवंतराव जगताप यांनीच विरोध दर्शवला. नंतर मात्र त्यांनी आपली भूमिका बदलत सुनील शिंदे यांना मुदतवाढ देण्याच्या बाजूने विषय लावून धरला. त्यामुळे वाद अधिकच वाढला. त्यामुळे सचिवांना मुदतवाढ देण्याचा विषय मतदानाला टाकण्यात आला. उपस्थित 16 संचालकांनी मतदानाचा हक्क बजावला. यावेळी आमदार संजय शिंदे समर्थक हमाल पंचायतीचे अध्यक्ष ऍड. राहुल सावंत यांचे संचालक रोडगे यांनी अनपेक्षितपणे जयवंतराव जगताप यांच्या विरोधात मतदान केले.

वास्तविक पाहता बाजार समितीच्या निवडूक निकालानंतर आमदार शिंदे यांचा पाठिंबा जगताप यांना आहे. मात्र या बैठकीत जगतापांना समर्थन देणारे वालचंद रोडगे यांनी बागल गटाच्या बाजूने मतदान केले. तर नारायण पाटील समर्थक दत्तात्रय रणसिंग यांनी जयवंतराव जगताप यांच्या बाजूने मतदान केले. समान मतदान झाल्यामुळे सभापती शिवाजी बनगर यांनी विशेष मताचा वापर करून सचिवांना मुदतवाढ देण्याचा विषय संपवला. तरीही बाजार समितीचे सचिव कोण होणार हा विषय इथेच संपला नाही.

बागल गटाचे नेते दिग्विजय बागल व त्यांच्या गटाच्या संचालकांनी प्रभारी सचिव म्हणून राजेंद्र पाटणे यांना नेमणूक करण्याचे ठरवले. तर सेवाज्येष्ठतेनुसार राजेंद्र पाटणे यांना सचिव म्हणून नेमता येणार नाही, सेवाज्येष्ठतेनुसारच पुढील सचिवपदाची संधी द्यावी, अशी भूमिका जयवंतराव जगताप यांनी घेतली. त्यामुळे (ता. 31) रोजी सचिव कोण हा विषय चर्चेसाठी होता. बाजार समितीतील वातावरण पाहता मोठा पोलिस बंदोबस्त ठेवण्यात आला.

यावेळी मात्र बागल गटाकडे बहुमत असूनही सत्ताधाऱ्यांना न जुमानता सेवानिवृत्त होत असलेले सचिव सुनील शिंदे यांनी सेवाज्येष्ठतेनुसार असलेले विठ्ठल क्षीरसागर यांच्याकडे पदभार दिला. सत्ताधाऱ्यांच्या विरोधात सेवानिवृत्त होत असलेले सचिव उघडपणे जातात. याचा सत्ताधाऱ्यांनी अंतर्मुख होऊन विचार करण्याची वेळ आली आहे. तर सत्ताधारी व विरोधकांनी कायमच राजकीय भूमिकेतून बाजार समितीकडे न पाहता शेतकरी हिताचे निर्णय घेण्यासाठी एकत्र येऊन कामकाज करावे, अशी माफक अपेक्षा शेतकरी वर्गाची आहे.(the karmala market committee is once again in discussion over the election of a secretary)