सांगोला : तुळजाभवानी मातेचे (Tuljabhavani Mata) दर्शन घेऊन गावाकडे परत जाताना भाविकांच्या भरधाव वेगाने जाणाऱ्या मोटारीने मालट्रकला मागून जोराची धडक दिली. या भीषण अपघातात कोल्हापूर जिल्ह्यातील दोघा भाविकांचा जागीच मृत्यू झाला, तर तिघेजण गंभीर जखमी झाले.

अपघात सोमवारी (ता. ७) पहाटे चारच्या सुमारास सोलापूर-सांगली महामार्गावरील (Solapur-Sangli Highway) चिंचोली बायपासजवळ (ता. सांगोला) घडला. अपघातातील मृत व जखमी कोल्हापूर जिल्ह्यातील आहेत.

सुखदेव कृष्णा बामणे (वय ४२) व नैनेश चंद्रकांत कोरे (३०, दोघेही रा. नांदणी, ता. शिरोळ, जि. कोल्हापूर) अशी मृतांची नावे आहेत. तर अनिल शिवानंद कोरे (४२, रा. नांदणी), सुधीर सुभाष चौगुले (रा. पेठवडगाव), सूरज संजय विभूते (३८, रा. कोथळी, ता. शिरोळ) गंभीर जखमी झाले आहेत.

त्यांना येथील खासगी रुग्णालयात दाखल केले आहे. अपघातानंतर महामार्ग पोलिस पथक व सांगोला पोलिसांनी तातडीने अपघातस्थळी धाव घेतली. अपघातग्रस्त मोटार महामार्गावरून दूर करून जखमींना खासगी रुग्णालयात दाखल केले. कोल्हापूर जिल्ह्यातील नांदणी व पेठवडगाव येथील पाच मित्र रविवारी (ता. ६) मोटारी (एमएच ०९- एफबी ३९०८) मधून नवरात्रीनिमित्त तुळजापूर येथील तुळजाभवानीच्या दर्शनासाठी गेले होते.

दर्शनानंतर त्याच मोटारीमधून पाचजण सोलापूरकडून महामार्गाने नांदणी (जि. कोल्हापूर) कडे निघाले होते. सांगोल्याजवळील चिंचोली बायपासवर त्यांच्या भरधाव मोटारीने डाळिंब घेऊन जाणाऱ्या १६ चाकी मालट्रक (एमपी २०- झेडएम ९५१८) ला मागून जोराची धडक दिल्याने हा भीषण अपघात झाला. जखमी सूरज विभूते यांनी मोटारचालक अनिल कोरे याच्याविरोधात सांगोला पोलिस ठाण्यात फिर्याद दाखल केली आहे.

नांदणीवर शोककळा

जयसिंगपूर : अपघाताचे वृत्त समजल्यानंतर नांदणी (ता. शिरोळ) गावावर शोककळा पसरली आहे. नांदणी व पेठवडगाव येथील मित्र देवीच्या दर्शनासाठी रविवारी रात्री दहाच्या सुमारास गेले होते. ते सर्व मध्यरात्री तुळजापूर येथे पोहोचले. आज पहाटे दर्शन घेतले आणि ते सकाळी नांदणीकडे परत येत होते.

सुखदेव बामणे नांदणी रस्ता संभाजीपूर येथे तर नैनेश कोरे आडकेवाडी येथे राहात होते. कोरे उदगाव येथील ल. क. अकिवाटे औद्योगिक वसाहतीमध्ये एका कंपनीत कामाला होते. त्यांच्या मागे आई, वडील, बहीण असा परिवार आहे. सुखदेव बामणे वर्कशॉपचे मार्केटिंग करीत होते. त्यांच्या मागे आई, वडील, पत्नी, मुलगा, मुलगी असा परिवार आहे.