बार्शी (सोलापूर) : माझ्या गावाचे नाव देशात रोशन झाले पाहिजे, खूप अभ्यास करीन पण जिल्हाधिकारी होणारच अन्‌ स्वप्न पूर्ण करणारच, अशी जिद्द ठेवली आणि यशस्वी झालो, अशी उत्स्फूर्त प्रतिक्रिया महाराष्ट्र लोकसेवा आयोगाने मागील वर्षात (2019) घेतलेल्या परीक्षेत 433 रॅंकने जिल्हाधिकारी झालेल्या अविनाश जाधवर यांनी "सकाळ'शी बोलताना दिली. सुजित बांगर (आयआरएस), रमेश घोलप (आयएएस), अभिजित बांगर (आयएएस), महादेव धारूरकर (आयएएस) यांच्यानंतर अविनाश जाधवर यांनी जिल्हाधिकारी (आयएएस) यश मिळवून पाचव्यांदा तालुक्‍यात मानाचा तुरा रोवला आहे. 

हेही वाचा : मोलमजुरी करणाऱ्या आईवडिलांच्या कष्टाला दिली श्रीकांतने झळाळी; पटकावला यूपीएससीत देशात 231 वा क्रमांक 

चुंब डोंगरघाटात गाव. घरची परिस्थिती बेताचीच. आठ एकर जिरायत शेती. वडील भीमराव जाधवर नववी उत्तीर्ण तर आई विमल अशिक्षित. एक भाऊ जनार्दन जाधवर वकिली व्यवसायात बार्शीत कार्यरत तर दोन बहिणी विवाह होऊन सासरी नांदत आहेत. जिल्हाधिकारी झालेल्या अविनाश जाधवर यांचे पहिली ते दहावीपर्यंतचे शिक्षण चुंब गावातील भगवान बाबा विद्यालय येथे झाले. दहावीमध्ये 84 टक्के गुण मिळाले अन्‌ बार्शीच्या भाऊसाहेब झाडबुके महाविद्यालयात विज्ञान शाखेत अकरावी, बारावीपर्यंतचे शिक्षण घेतले. बारावीला 88 टक्के गुण मिळाले होते. पुणे येथे ऍग्रिकल्चरला प्रवेश मिळाला. एमएस्सी ऍग्रिकल्चर, राहुरी विद्यापीठ, राहुरी येथे पूर्ण केले. त्यानंतर लोकसेवा आयोगाच्या परीक्षेचा अभ्यास सुरू केला. दोनवेळा परीक्षा दिली पण यश मिळाले नाही. तिसऱ्या प्रयत्नामध्ये यशस्वी झालो, असे जाधवर यांनी सांगितले. 

मागील तीन वर्षांपासून दिल्ली येथे फक्त अभ्यास अन्‌ अभ्यास... यासाठी खासगी क्‍लासेसमध्ये प्रवेश घेऊन अभ्यास केला. जिल्हाधिकारी होण्याचे ध्येय, स्वप्न होते. चुंब गावासह तालुक्‍याचे नाव यशोशिखरावर पोचवण्याची जिद्द होती, असेही अविनाश जाधवर यांनी आवर्जून सांगितले. 

संपादन : श्रीनिवास दुध्याल